KPK shkëput memorandumet me shoqërinë civile: gjashtë vota për, një kundër

Pamjet ekskluzive nga arrestimet dhe bastisjet u bënë argumenti kryesor që çoi Këshillin Prokurorial të Kosovës drejt një vendimi të rëndë: shkëputjen e të gjitha memorandumeve të bashkëpunimit me organizatat e shoqërisë civile. Propozimi i kryeprokurorit të shtetit, Zejnullah Gashi, kaloi me gjashtë vota për dhe vetëm një kundër.

I vetmi anëtar i KPK-së që votoi kundër ishte Milot Krasniqi.

Në mbledhjen e 302-të të Këshillit, kryeprokurori Gashi deklaroi se viteve të fundit organizata dhe media të caktuara e kanë marrë primatin që të publikojnë pamje ekskluzive dhe informacione të personave të dyshuar në fazat fillestare. Sipas tij, publikime të tilla rrezikojnë integritetin e hetimeve, konfidencialitetin dhe prekin sigurinë juridike.

Gashi e cilësoi të papranueshme që, në aksionet që zhvillohen bashkë me Policinë, Prokuroria të lejojë publikimin e pamjeve nga arrestimet dhe bastisjet që identifikojnë qartë të pandehurit në procedurë. Në këtë mënyrë, thotë ai, bëhet një gjykim publik ndaj palëve që janë subjekt hetimi në fazën krejt fillestare. Ai shtoi se janë dëshmitarë të cenimit të integritetit të hetimeve pikërisht në këto faza.

Kryeprokurori kërkoi nga Këshilli shfuqizimin e memorandumeve, duke argumentuar edhe me pasojat financiare të padive ndaj sistemit.

"Deri më tani kemi bashkëpunu me organizata të ndryshme, mendoj që duhet të ndalohen për arsye se ne jemi subjekt i padive të shumta që bëhen për veprimet tona në KGJK, të cilat vendime po e dëmtojnë buxhetin e Republikës së Kosovës, me veprime tona që në të ardhmen, vendimet po janë aktgjykimet lirues… unë mendoj që këto vendime duhet të shqyrtohen të vlerësohen, në këtë aspekt, mendoj që duhet edhe të shfuqizohen këto memorandume", deklaroi Gashi.

Sipas kryeprokurorit, memorandumet dhe bashkëpunimet me shoqërinë civile nuk kanë bazë ligjore. Besimi i qytetarëve në sistemin e drejtësisë, sipas tij, duhet të tregohet me argumente, duke ndërtuar aktakuza të mirëfillta, të bazuara në prova, që marrin epilog me aktgjykime dënuese.

Për të ardhmen, Gashi kërkoi një kornizë të njëjtë për të gjithë: "Format e bashkëpunimit në të ardhmen me të gjitha organizatat e shoqërisë civile të jenë me të gjitha dhe me mediat, dhe të jenë të barabarta dhe të rregullohen me rregullore të veçantë."

Kundërshtimi i vetëm brenda Këshillit erdhi nga anëtari Milot Krasniqi, i cili propozoi që anëtarëve t'u jepen në shikim të gjitha kopjet e memorandumeve dhe që bashkëpunimet të mos shfuqizohen derisa të vendoset krijimi i një akti nënligjor për rregullimin e formave të bashkëpunimit.

"Me u trajtu në një pikë të veçantë, jo që sot me u shfuqizu këto memorandume të bashkëpunimit, se është thyerje e një zotimi që më parë e ka dhënë një ish-kryeprokuror i shtetit", tha Krasniqi.