KfW paralajmëron ndërprerje të mbështetjes për Termokosin: problemi "jashtëzakonisht kritik"

Ngrohja qendrore e Prishtinës është bërë objekt i një përplasjeje teknike mes ndërmarrjes publike "Termokos" dhe një prej financuesve të saj kryesorë ndërkombëtarë. Banka Gjermane për Zhvillim (KfW), në një letër drejtuar Bordit të Drejtorëve të Termokosit, ka ngritur një varg shqetësimesh për gjendjen teknike të rrjetit dhe ka paralajmëruar madje ndërprerjen e mbështetjes së saj.

Në qendër të mosmarrëveshjes qëndron impianti i degazifikimit, pjesë e sistemit të trajtimit të ujit që ka rol në mbrojtjen afatgjatë të instalimeve dhe pajisjeve të ngrohjes. Sipas KfW-së, e cila thotë se është informuar nga Konsulenti i Implementimit, ky impiant nuk është funksional. Banka e konsideron problemin "jashtëzakonisht kritik" nga aspekti teknik dhe ekonomik, duke përmendur rrezikun e korrozionit dhe dëmtimit të rrjetit të ngrohjes.

Termokosi ka konfirmuar se ka pranuar komunikimin zyrtar të KfW-së, në të cilin janë ngritur shqetësime lidhur me zbatimin e disa obligimeve teknike, procedurale dhe institucionale. Ndërmarrja thotë se çështjet janë trajtuar në nivel të menaxhmentit dhe të Bordit të Drejtorëve, duke i cilësuar komunikime të tilla si pjesë e mekanizmave të rregullt të monitorimit të projekteve të financuara nga institucionet financiare ndërkombëtare.

Sipas ndërmarrjes, shqetësimet e KfW-së kërkojnë trajtim institucional, por nuk paraqesin tregues se projekti ka dështuar. Termokosi thotë se problemi me degazifikimin nuk duhet interpretuar si shenjë se rrjeti i ngrohjes qendrore në Prishtinë është para një ndërprerjeje apo kolapsi të menjëhershëm. "Ky rrjet ka funksionuar edhe në të kaluarën, funksionon edhe tani dhe do të vazhdojë të funksionojë edhe më tutje", thuhet në përgjigjen e ndërmarrjes.

Termokosi bën të ditur se çështja e impiantit është identifikuar dhe trajtuar në kuadër të përmbylljes së punëve të kontratës përkatëse, dhe se ka kërkuar një vlerësim profesional e teknik për të përcaktuar nëse impianti ka nevojë për riparim, rehabilitim apo ndonjë ndërhyrje tjetër. Në mbledhjen e datës 6 gusht 2026, Bordi i Drejtorëve ka miratuar revidimin e buxhetit dhe ndarjen e mjeteve financiare për adresimin e kësaj çështjeje. Sipas ndërmarrjes, sistemi është instaluar nga kontraktori i financuar nga KfW dhe është në operim, ndërsa ndërhyrja e planifikuar lidhet me rritjen e performancës së rrjetit dhe zgjatjen e jetëgjatësisë së tij.

Termokosi ka mohuar gjithashtu se në takimet me partnerët ndërkombëtarë të jetë diskutuar tërheqja e fondeve të donatorëve nga projekti "Solar4Kosovo II". "Në asnjë rast në takimet e rregullta me partnerët ndërkombëtarë nuk është diskutuar tërheqja e fondeve të donatorëve nga realizimi i këtij projekti. Përkundrazi, gjatë periudhës së fundit janë ndërmarrë vendime konkrete për adresimin e tyre dhe ndërmarrja mbetet e përkushtuar ndaj zbatimit me sukses të projektit 'Solar4Kosovo II' dhe përmbushjes së obligimeve ndaj partnerëve financiarë", thuhet në përgjigjen e ndërmarrjes. Termokosi ka theksuar se nuk do të lejojë që problemet e evidentuara të pengojnë realizimin e projektit apo të rrezikojnë bashkëpunimin me partnerët ndërkombëtarë.