KEK ndal njësinë A4 pas parregullsive teknike: ekipet në terren për të zbuluar shkakun

Korporata Energjetike e Kosovës (KEK) ka njoftuar se njësia gjeneruese A4 është ndalur në mënyrë të kontrolluar më 11 gusht, në ora 00:00, pasi u evidentuan disa parregullsi teknike.

Sipas KEK-ut, vendimi u mor si masë parandaluese dhe në përputhje me kërkesat e sigurisë teknike, me qëllim që të krijohen kushtet e nevojshme për kontrollimin dhe ndërhyrjen në pajisjet e njësisë.

Menjëherë pas ndaljes, korporata thotë se ka angazhuar ekipe për të gjetur burimin e problemit. "Ekipet profesionale janë angazhuar menjëherë në vlerësimin e gjendjes teknike, identifikimin e shkakut dhe ndërmarrjen e veprimeve të nevojshme për eliminimin e problemit", thuhet në njoftimin e KEK-ut.

Sipas KEK-ut, njësia A4 do të rikthehet në operim pasi të përfundojnë kontrollet dhe ndërhyrjet teknike dhe pasi të konfirmohen kushtet e sigurta për funksionim. Korporata ka theksuar se opinioni do të njoftohet me kohë për zhvillimet e mëtejshme dhe për afatin e kthimit të njësisë në punë.