Katër vdekje brenda gjashtë muajve: punëtorët e KEK-ut dalin në protestë të mërkurën

Të mërkurën në orën 08:00, minierat dhe termocentralet e Korporatës Energjetike të Kosovës do të bëhen skenë proteste. Vendimi u mor pas mbledhjes së jashtëzakonshme të Kryesisë së Sindikatës së Re të KEK-ut, mbajtur më 24 gusht 2026, dhe u bë publik nga kryetari i saj, Xhelal Jashari.

"Si kryesi morëm vendim që të mërkurën në ora 08:00 të mëngjesit të shprehim pakënaqësinë tonë në tri divizione. Pra të mërkurën në ora 08:00 Sindikata e Re e KEK-ut së bashku me të gjithë punëtorët në tri divizione do të protestojë dhe do të solidarizohet me familjet e punëtorëve që kanë humbur jetën në vendin e tyre të punës", tha Jashari.

Protesta do të zhvillohet njëkohësisht në Divizionin e Prodhimit të Qymyrit, në Termocentralin "Kosova A" dhe në Termocentralin "Kosova B". Para saj, sipas Jasharit, do të mbahet edhe një veprim paraprak në kryeqytet: "Prandaj, para të mërkurës do të kemi edhe një protestë simbolike para Drejtorisë në Prishtinë. Ajo do të jetë simbolike, ndërsa të mërkurën do të ketë protestë me të gjithë punëtorët e Korporatës Energjetike të Kosovës në tri divizionet: në Divizionin e Prodhimit të Qymyrit, në Divizionin e Termocentralit 'Kosova A' dhe në Divizionin e Termocentralit 'Kosova B'."

Në qendër të ankesave sindikale qëndrojnë kushtet e punës dhe pajisjet mbrojtëse. "Sot është diskutuar gjerë e gjatë për kushtet e punëtorëve të Korporatës Energjetike të Kosovës dhe është vlerësuar duke konstatuar se kushtet janë jashtëzakonisht të vështira në punë, por edhe siguria e punëtorëve dhe pajisjet mbrojtëse janë mungesë jashtëzakonisht e madhe në Korporatën Energjetike të Kosovës", deklaroi Jashari më 24 gusht. Ai shtoi se protesta ka pikërisht këtë synim: "Prandaj, morëm vendim që të mërkurën, në orën 08:00 të mëngjesit, në tri divizionet të shprehim pakënaqësinë tonë për pajisjet mbrojtëse dhe për kushtet e punëtorëve në punë."

Duke i cilësuar të rënda vdekjet në vendin e punës, kreu i sindikatës u ndal te pritshmëria më elementare e çdo turni: "Edhe një herë e ngritëm shqetësimin sepse rastet që po ndodhin janë raste jashtëzakonisht të rënda, sepse këta punëtorë dhe këta djem e këta burra kanë ardhur këtu për me punu, me dhanë djersën e me dhanë maksimumin që Kosova të ketë dritë, dhe në fund të ditës të kthehen shëndoshë e mirë te familjet e tyre, e atë kontributin e tyre t'ia kthejnë familjeve të veta."

Jashari ngriti edhe një shqetësim për shpërndarjen e mjeteve brenda korporatës. "Ne e ngritëm shqetësimin që duhet të ketë një koordinim të menaxhmentit pak më të mirë. Është shqetësim sepse derisa një menaxher ose një drejtor i ka 4-5 vetura në dispozicion për punën e tij, ndërsa punëtorët kanë mungesë veturash për të dalë në terren, për të dalë në prodhim, për t'i koordinuar punët e për t'i zgjidhur punishtet e tyre në frontin e punës, kjo është e papranueshme për neve", tha ai.