Kanali “AlbKings” sërish aktiv në Telegram, me mbi 13 mijë anëtarë dhe premtime për materiale “VIP”

Emri “AlbKings” është rishfaqur në Telegram. Një grup dhe një kanal që mbajnë këtë emër numërojnë aktualisht mbi 13 mijë anëtarë, përkatësisht mbi 11 mijë abonentë, ndërsa në postimet e fundit administruesit e tyre paralajmërojnë përmbajtje të re, të cilën e cilësojnë si “VIP” dhe “Premium”.

Sinjalizimi për këtë aktivitet, së bashku me pamjet nga grupi dhe kanali, ka mbërritur nga një qytetar në redaksinë e Gazetës Sinjali.

Në një prej postimeve thuhet se po përgatitet një koleksion me “video & foto të ndryshme VIP”, me materiale të vjetra dhe të reja. Në listën e emrave që përmenden nga administruesit janë Noizy, Enca, Don Xhoni, Xhensila Myrtezaj, Cozman dhe Tuna. Në një postim tjetër, administruesit e paraqesin grupin si “ekskluziv”, me fotografi të personave të njohur, dhe njoftojnë se përmbajtja e re do të publikohet “shumë shpejt”. Një njoftim i tretë përdor shprehjen “PREMIUM VIP, SË SHPEJTI”, duke u kërkuar ndjekësve të qëndrojnë në pritje.

Nuk ka asnjë dëshmi se materialet e premtuara nga administruesit ekzistojnë vërtet. Personat, emrat e të cilëve përmenden në ato postime, nuk kanë dhënë ndonjë reagim publik, ndërsa identiteti i administruesve mbetet i panjohur.

Emri “AlbKings” u bë në vitin 2024 një prej temave më të diskutuara në Kosovë, pikërisht për shkak të shpërndarjes së materialeve intime pa pëlqim. Deri më tani nuk është bërë publike ndonjë deklaratë e policisë apo e prokurorisë lidhur me rikthimin e këtij grupi në Telegram.