Kalaja e Prizrenit mbyllet për dy javë, nisin punimet emergjente për sigurinë

Dyert e Kalasë së Prizrenit janë mbyllur për vizitorët. Ministria e Kulturës dhe Turizmit ka njoftuar se qasja në këtë monument ndërpritet përkohësisht për një periudhë prej dy javësh, duke filluar nga sot, për shkak të fillimit të punimeve për zbatimin e masave emergjente.

"Ministria e Kulturës dhe Turizmit njofton se, për shkak të fillimit të punimeve për zbatimin e masave emergjente, Kalaja e Prizrenit do të mbyllet përkohësisht për vizitorë për një periudhë prej dy javësh, duke filluar nga sot", thuhet në njoftimin e ministrisë.

Arsyeja e ndalimit të qasjes lidhet drejtpërdrejt me sigurinë e atyre që lëvizin brenda perimetrit të kalasë. "Vendimi është marrë me qëllim të garantimit të sigurisë së vizitorëve dhe punëtorëve gjatë zhvillimit të punimeve", ka theksuar ministria.

Kalaja e Prizrenit është një nga pikat kryesore turistike të vendit dhe mbyllja e saj, edhe pse e përkohshme, prek drejtpërdrejt qarkullimin e vizitorëve në qytet gjatë dy javëve të ardhshme.