Han i Elezit del në protestë kundër djegies së gomave në fabrikën SharrCem

Qytetarët e Hanit të Elezit do të dalin të premten në rrugë kundër përdorimit dhe djegies së gomave të përdorura si lëndë djegëse në procesin e prodhimit të çimentos në fabrikën SharrCem. Protesta është caktuar për më 14 gusht 2026 dhe do të nisë në orën 14:00.

Grumbullimi i qytetarëve do të bëhet para Komunës së Hanit të Elezit, prej nga protestuesit pritet të vazhdojnë drejt hyrjes së fabrikës SharrCem.

Sipas asamblistit në Kuvendin Komunal të Hanit të Elezit, Visar Hasallari, protesta po organizohet nga banorët për të kundërshtuar përdorimin e gomave të përdorura dhe për të kërkuar më shumë transparencë lidhur me këtë proces.

Hasallari ka thënë se debati publik i mbajtur për këtë çështje nuk është paraprirë nga një informim i mjaftueshëm i qytetarëve, gjë që, sipas tij, e bëri pjesëmarrjen e tyre pothuajse inekzistente. Në atë debat, thotë ai, ishin kryesisht disa punëtorë të fabrikës, ndërsa qytetarët nuk patën mundësi të mjaftueshme për t'u informuar dhe për të shprehur qëndrimin e tyre.

"Për një çështje që mund të ndikojë drejtpërdrejt në mjedisin dhe shëndetin e banorëve, qytetarët duhet të jenë të informuar dhe të kenë mundësi reale të marrin pjesë e të shprehin qëndrimin e tyre", ka deklaruar Hasallari.

Banorët kanë kërkuar nga Ministria e Mjedisit që debati publik të përsëritet, si dhe vlerësime profesionale nga institucione të tjera, përfshirë Institutin Kombëtar të Shëndetësisë Publike të Kosovës (IKShPK).

Sipas Hasallarit, pasi kërkesat institucionale nuk kanë sjellë zgjidhjen e kërkuar, qytetarët kanë vendosur të protestojnë në mënyrë paqësore.