Grupi terrorist "Brigada e Veriut" me video kërcënuese për Kosovën: "Na pritni, po vijmë"

Persona të armatosur, mesazhe kërcënuese dhe një premtim i errët për "ardhje në Kosovë" — kjo është përmbajtja e një videoje që qarkullon në emër të organizatës "Brigada e Veriut" (Severna Brigada), e cila është shpallur terroriste nga institucionet e Republikës së Kosovës.

Videoja është publikuar në profilin e "Severna Brigada" në rrjetin social Facebook. Në pamje shfaqen persona të armatosur, njëri prej të cilëve thotë se ndodhet në një "fushëbetejë" dhe se po përgatiten për të ardhur në Kosovë. Në mesazh përdoret narrativë nacionaliste serbe dhe përmendet lidhja mes Rusisë dhe Serbisë.

"Ne jemi këtu për momentin, punojmë, punojmë edhe unë edhe vëllai im rus. Zdravo! Përshëndetje të madhe. Të gjithëve përshëndetje të mëdha nga ne. Po përgatitemi për Kosovën e shenjtë. Të shohim pastaj se çfarë do të ndodhë, kur të vijmë atje nga kjo fushëbetejë. Siç thotë njëri, gjithçka do të jetë Rusi, vetëm Kosova Serbi. Na pritni, së shpejti po vijmë. Atëherë do të shohim kush jeni ju e kush jemi ne", thuhet në video.

Në një moment tjetër, një person shprehet në gjuhën ruse, me një përshëndetje: "Tung. Përshëndetje e madhe."

"Brigada e Veriut" u shpall organizatë terroriste nga institucionet e Republikës së Kosovës më 29 qershor 2023. Autenticiteti i videos, vendndodhja e personave të shfaqur dhe koha e xhirimit nuk janë konfirmuar nga autoritetet.