Grabitje në mes të ditës në Fushë Kosovë: 66-vjeçares i i grabitet zinxhiri

Një grabitje në mes të ditës ka tronditur një lagje banimi në Fushë Kosovë, ku një grua rreth 66-vjeçare u sulmua pikërisht në momentin kur po hynte në ashensorin drejt banesës së saj.

Ngjarja dyshohet të ketë ndodhur më 18 gusht, rreth orës 15:50, në rrugën "Besa Besë", te objekti banesor "Efro Luki 2". Sipas rrëfimit të viktimës, e identifikuar me inicialet E.E., ndërsa po hynte në ashensor, një person i panjohur iu afrua nga pas.

I dyshuari, sipas të njëjtit rrëfim, fillimisht vendosi këmbën te dera e ashensorit për të penguar mbylljen, më pas e kapi gruan për fyti dhe ia mori zinxhirin që mbante në qafë. Pas grabitjes, ai u largua me vrap nga objekti, hipi në një veturë të bardhë dhe u zhduk në drejtim të panjohur.

Viktima nuk ka pësuar lëndime trupore, por për shkak të shqetësimit të shkaktuar nga ngjarja ka pranuar trajtim mjekësor.

Sipas informacioneve, policia ka nisur menjëherë veprimet hetimore dhe ka identifikuar automjetin që dyshohet se u përdor gjatë grabitjes — një Renault të bardhë. Vetura më pas u lokalizua e braktisur në afërsi të hekurudhës. Hetuesit kanë arritur të identifikojnë dhe të arrestojnë personin që dyshohet se e drejtonte atë, një 33-vjeçar me inicialet F.K., i cili është shoqëruar në Stacionin Policor në Fushë Kosovë.

Pas konsultimit me prokurorin, rasti është iniciuar si "Grabitje". Hetimet po vazhdojnë për të sqaruar rolin e personave të përfshirë dhe rrethanat e plota të ngjarjes.