Gjakovë: 17-vjeçarja denoncon babanë për dhunë, nëna hedh poshtë akuzat

Një rast i dyshuar i dhunës në familje ndaj një vajze të mitur po hetohet në fshatin Dobrixhë të Gjakovës, ku në qendër të konfliktit, sipas rrëfimit të vetë vajzës, qëndron një lidhje dashurie me një person që ndodhet në Austri.

Rasti u raportua më 17 gusht, rreth orës 14:00. Policia nisi menjëherë procedurat për trajtimin e ngjarjes. Viktima është një vajzë rreth 17-vjeçare, e identifikuar me inicialet A.U., ndërsa si i dyshuar u intervistua babai i saj, R.U., rreth 50 vjeç.

Për shkak të moshës, e mitura u shoqërua në polici dhe u intervistua në praninë e një punëtori social. Gjatë deklarimit, ajo pretendoi se ishte sulmuar nga babai për shkak të lidhjes me personin në Austri. Megjithatë, vajza tha se nuk ndihej e rrezikuar prej tij dhe refuzoi strehimin si dhe trajtimin mjekësor.

Në kuadër të hetimeve u mor në pyetje si dëshmitare edhe nëna e vajzës, e cila dha një version tjetër të ngjarjes, duke mohuar se e bija ishte keqtrajtuar nga bashkëshorti.

Policia e arrestoi 50-vjeçarin dhe e intervistoi në praninë e avokatit mbrojtës. Pas marrjes në pyetje dhe konsultimit me prokurorin kujdestar, i dyshuari u lirua në procedurë të rregullt. Rasti mbetet nën hetim.