Gjakovë: 101 motoçikleta të sekuestruara dhe 366 gjoba që nga nisja e sezonës verore

Motoçiklistët që kthejnë rrugët e Gjakovës në pistë janë vënë në shënjestër të policisë. Që nga fillimi i sezonës verore, Njësia e motoçikletave e Njësisë Rajonale të Komunikacionit Rrugor në Gjakovë ka shqiptuar 366 gjoba për kundërvajtje të ndryshme dhe ka sekuestruar 101 motoçikleta.

Sipas Drejtorisë Rajonale të Policisë në Gjakovë, veprimet janë kryer nga njësia e motoçikletave në bashkëpunim me patrullat me automjete inteligjente. Fokusi kryesor, thekson policia, janë ngasësit që rrezikojnë sigurinë e qytetarëve, me vëmendje të veçantë te drejtuesit e motoçikletave.

Policia e paraqet fushatën si pjesë të një përkushtimi të vazhdueshëm ndaj sigurisë rrugore dhe uljes së numrit të aksidenteve, masa këto të ndërmarra që nga hapja e sezonës verore.

Drejtoria Rajonale e Policisë në Gjakovë u bëri thirrje të gjithë pjesëmarrësve në trafik, e veçanërisht drejtuesve të motoçikletave, që të respektojnë rregullat e qarkullimit, duke i cilësuar ato si thelbësore për parandalimin e aksidenteve dhe sigurinë e të gjithëve në rrugë.