Fushë Kosovë: Gruaja tërhiqet zvarrë në rrugë, arrestohet partneri për dhunë

Një raportim shqetësues për një person që po tërhiqej zvarrë në rrugë mobilizoi policinë në orët e hershme të mëngjesit në Fushë Kosovë. Ngjarja u raportua më 18 gusht, rreth orës 06:30, në rrugën "Abedin Sugojeva", ku njësitet policore dolën menjëherë dhe hasën një çift që bashkëjetonte pa kurorë.

Bëhet fjalë për një grua rreth 29-vjeçare dhe partnerin e saj rreth 29-vjeçar, i cili u shoqërua në Stacionin Policor në Fushë Kosovë. Gruaja pranoi trajtim mjekësor, ndërsa deklarimi i saj para hetuesve zbuloi pretendime për një histori dhune që, sipas saj, nuk kishte nisur atë mëngjes.

29-vjeçarja deklaroi se për rreth tre muaj ishte përballur vazhdimisht me dhunë fizike dhe psikike nga partneri. Sipas deklarimit të viktimës, rreth mesnatës së 18 gushtit, derisa ndodheshin në banesën e tyre, i dyshuari dyshohet se e kishte goditur me grushte, duke i shkaktuar lëndim në kokë.

Për rastin u njoftua prokurori kujdestar për Dhunë në Familje, i cili urdhëroi inicimin e rastit dhe ndalimin e të dyshuarit për 48 orë. I dyshuari u dërgua në Qendrën e Mbajtjes në Lipjan, ndërsa rasti po trajtohet si "Dhunë në familje".