FSK merr 12 kamionë ushtarakë nga Gjermania, flota logjistike arrin në 35 automjete

Dymbëdhjetë kamionë ushtarakë UNIMOG të Mercedes-Benz, të tipit 5T me tërheqje 4×4, i janë dorëzuar Forcës së Sigurisë së Kosovës (FSK). Kamionët janë blerë për nevojat e FSK-së dhe, bashkë me tetë kamionë Rheinmetall që mbërritën gjatë kësaj jave, e çojnë në 35 numrin e automjeteve të pranuara deri tani nga këto dy kategori, sipas ministrit të Mbrojtjes, Ejup Maqedonci.

Në ceremoninë e pranimit morën pjesë kryeministri Albin Kurti, komandanti i FSK-së, gjenerallejtënant Bashkim Jashari, ambasadori i Gjermanisë në Kosovë, Rainer Rudolph, si dhe Daniel Zittel, përfaqësues i Daimler Truck Defence dhe Mercedes-Benz Special Trucks.

Sipas Maqedoncit, kamionët e rinj ofrojnë "lëvizshmëri të lartë në terrene të vështira dhe do të mbështesin transportimin e personelit, pajisjeve e materialeve, si dhe furnizimin e njësive në kushte të ndryshme operacionale". Ai shtoi se "Së bashku me kamionët Rheinmetall 8×8, ata do të forcojnë mbështetjen logjistike dhe aftësinë e njësive për të vepruar me efikasitet".

Ministri theksoi se një forcë moderne ka nevojë për kapacitete që i mundësojnë të lëvizë, të furnizohet dhe të kryejë detyrat e saj, duke e cilësuar logjistikën si pjesë thelbësore të gatishmërisë operacionale.

Gjermania nuk është vetëm furnitore. Sipas Maqedoncit, Berlini po e mbështet FSK-në edhe përmes donacioneve: në vitin 2024 FSK pranoi pesë kamionë Rheinmetall KX 8×8 si dhuratë nga Gjermania. Sipas planifikimit, gjatë vitit 2027 pritet të pranohen edhe dy kamionë të tjerë Rheinmetall KX 8×8 dhe katër kamionë zjarrfikës UNIMOG të Mercedes-Benz, po ashtu si donacion. "E vlerësojmë këtë mbështetje konkrete dhe partneritetin e vazhdueshëm mes vendeve tona", deklaroi ministri.

Për të njëjtin vit janë planifikuar të mbërrijnë edhe dhjetëra kamionë të tjerë të blerë. Sipas ministrit, këto prurje, nga blerjet dhe donacionet, janë pjesë e planifikimit afatgjatë për zhvillimin e kapaciteteve transportuese dhe logjistike të FSK-së.

Maqedonci falënderoi kryeministrin Kurti për mbështetjen, komandantin Jashari për bashkëpunimin e vazhdueshëm, si dhe ambasadorin Rudolph dhe Zittel për bashkëpunimin. "Do të vazhdojmë të investojmë në pajisje, infrastrukturë dhe kapacitete njerëzore, për një forcë profesionale, moderne dhe të ndërveprueshme me partnerët tanë, në shërbim të sigurisë së Republikës së Kosovës dhe qytetarëve të saj."