Dylbi për pushkë snajper e fshehur në veturë, Dogana e ndalon në Kullë

Një dylbi e destinuar për përdorim me pushkë snajper është gjetur e fshehur në një automjet me targa të huaja në pikëkalimin kufitar Kullë, ka njoftuar Dogana e Kosovës.

Sipas Doganës, vetura drejtohej nga një shtetas i Kosovës, i cili gjatë intervistimit nuk kishte deklaruar se transportonte mallra apo mjete që duhej të deklaroheshin. Megjithatë, dyshimet e krijuara gjatë kontrollit i shtynë zyrtarët doganorë të kryenin një kontroll të detajuar të automjetit.

Pikërisht gjatë këtij kontrolli u zbulua dylbia. Për të, sipas Doganës, udhëtari nuk paraqiti dokumentet apo autorizimet përkatëse.

Malli është ndaluar, ndërsa ndaj personit janë ndërmarrë masat përkatëse dhe është iniciuar procedura kundërvajtëse së bashku me procedura të tjera administrative, në pajtim me legjislacionin në fuqi.

"Dogana e Kosovës ka theksuar se mbetet e përkushtuar në kontrollin e kufijve dhe parandalimin e hyrjes së mallrave të rrezikshme, të kufizuara apo të palejuara në territorin e Kosovës", thuhet në njoftimin e institucionit.