Dyer të thyera dhe mbishkrime në muret e shkollës “Dituria” në Ferizaj, nis hetimi

Shkolla Fillore e Mesme e Ulët “Dituria” në fshatin Dardani të Ferizajt është shënjestër e një sërë dëmtimesh, për të cilat Policia e Kosovës ka nisur hetimin.

Sipas njoftimit të vetë shkollës, dyert e banjove janë thyer, është dëmtuar druri dhe janë lënë disa mbishkrime në muret e objektit. Dëmtimet dyshohet se janë shkaktuar nga disa persona, të cilët deri tani nuk janë identifikuar.

Rastin e ka konfirmuar drejtori i Arsimit në Ferizaj, Afrim Llabjani, i cili tha se ka biseduar me drejtorin e shkollës dhe se ky i fundit e ka njoftuar Policinë. Sipas Llabjanit, ishte thyer edhe një dritare, e cila u riparua menjëherë sepse aty po punonte një operator, dhe se kjo është hera e parë që një ngjarje e tillë ndodh në këtë shkollë. “Një dritare është thyer edhe e sanon, sepse është një operator duke punuar aty. Kjo është hera e parë që ndodh në këtë shkollë”, deklaroi ai.

Llabjani shtoi se shkolla ka kamera sigurie, por tha se nuk ishte në dijeni nëse në pamjet e tyre është parë kush i shkaktoi dëmet.

Në njoftimin e saj, shkolla “Dituria” u bëri thirrje prindërve që të tregojnë më shumë kujdes: “Për të gjitha këto dëmtime është njoftuar Policia e Kosovës, e cila është duke e hetuar rastin. Lusim prindërit që të jenë më të kujdesshëm me fëmijët e tyre duke i këshilluar që të mos bëjnë veprime të ndaluara në oborrin e shkollës.”

Zëdhënësi i Policisë në Ferizaj, Kanun Veseli, konfirmoi se raportimi për rastin është pranuar më 19 gusht 2026. “Policia ka nisur hetimet lidhur me rastin. Aktualisht janë duke u ndërmarrë veprimet e nevojshme hetimore, përfshirë marrjen e deklaratave dhe procedurat e tjera përkatëse, me qëllim të sqarimit të plotë të rrethanave të rastit”, tha Veseli.