Dy të vdekur brenda një muaji në KEK: eksperti kërkon dërgimin e termocentraleve në remont

Vdekja e dy punëtorëve të Korporatës Energjetike të Kosovës brenda një muaji ka vënë në qendër të vëmendjes kushtet e sigurisë në termocentralet e vendit. Arian Ibishi, ekspert i Sigurisë dhe Shëndetit në Punë, ka deklaruar se kushtet e punës aty janë "tejet të rrezikshme" dhe se problemi nuk qëndron te një shkak i vetëm, por te një kombinim rreziqesh.

I ftuar në emisionin "Interaktiv" në KTV, Ibishi ka rekomanduar që termocentralet të dërgohen në remont, pasi sipas tij nuk plotësohen kushtet për punë.

"Kur flasim për KEK-un duhet theksuar se nuk kemi të bëjmë vetëm me një shkaktar të rrezikut, por me një kombinim të rreziqeve. Kemi të bëjmë me një makineri të stërvjetuar, rreziqet dihet që janë permanente. Pastaj kur flasim për pluhurin që ekziston brenda termocentralit është në ekstrem i rrezikshëm për punonjësit aty. Kur flasim për qymyrin që është aty normalisht, ka gazra kimike që janë të dëmshme, prandaj do të rekomandoja që termocentrali të shkojë komplet në remont, sepse nuk i plotëson kushtet sa i përket sigurisë dhe shëndetit në punë", ka thënë Ibishi.

Duke vënë theksin te përparësia mes prodhimit dhe njerëzve, ai ka shtuar se "prodhimi i energjisë elektrike është i rëndësishëm, por më e rëndësishme është jeta e njerëzve që punojnë aty."

Deklarata vjen pasi brenda një muaji dy punëtorë të KEK-ut kanë humbur jetën nga lëndimet në vendin e punës. Njëri prej tyre, 59-vjeçari Haxhi Gjinovci, i sistemuar në pozitën "Teknik i Xehtarisë" në kuadër të Divizionit të Prodhimit të Qymyrit, pësoi lëndime të rënda të dielën mbrëma dhe nuk arriti t'u mbijetojë plagëve. Vdekjen e tij korporata e bëri të ditur gjatë ditës përmes një postimi në Facebook.

Rreziku në vendet e punës mbetet një dukuri e gjerë në Kosovë. Sipas të dhënave të Inspektoratit Qendror të Punës, rreth 20 persona kanë humbur jetën në vendin e punës gjatë vitit 2025, ndërsa mbi dhjetë raste me fatalitet janë regjistruar deri më tani për këtë vit.