ReklamëHapësirë reklame
ReklamëHapësirë reklame
Reklamë
Enver Halimi nga Podujeva shkoi për një rezonancë magnetike të shtyllës kurrizore dhe u kthye në shtëpi me një raport që fliste për kancer. Dhjetë ditë ekzaminimesh më vonë doli se raporti i takonte një pacienti tjetër me emër e mbiemër identik.
Enver Halimi nga Podujeva kaloi dhjetë ditë të shtrirë në Klinikën e Gastroenterologjisë, duke iu nënshtruar ekzaminimeve të njëpasnjëshme me dyshimin se kishte kancer. Në fund doli se raporti që e nisi gjithë këtë nuk ishte i tiji.
Halimi ishte paraqitur në klinikën private "Aloka" në Prishtinë me rekomandim të mjekut, pas dhimbjeve në boshtin kurrizor, për të kryer një incizim me rezonancë magnetike. Pasi dorëzoi të dhënat personale dhe pagoi faturën, u kthye në shtëpi për të pritur rezultatet, që sipas procedurës përpunohen brenda 24 orëve.
"Unë kam shku në 'Aloka' për me bë incizimin e unazave, kam telashe me boshtin kurrizor. Kemi shku me djalin atje. I kemi dhanë shënimet, me letërnjoftim, me numër telefoni. E kemi bërë incizimin. Kur e kemi bërë, na kanë liru aty. Raportin na thanë që na dërgojnë me email brenda 24 orëve", tregon Halimi.
Raporti që mbërriti një ditë më vonë mbante emrin dhe mbiemrin e tij, ndërsa rezultati fliste për praninë e një kanceri. Halimi nuk i kontrolloi të dhënat e tjera në dokument, si datën e lindjes apo numrin e letërnjoftimit. Me raportin në dorë shkoi në emergjencën e Podujevës, prej nga u udhëzua të shtrihej menjëherë në Klinikën e Gastroenterologjisë.
"Në atë moment kemi shku e kemi marrë udhëzimin te Emergjenca në Podujevë, e kemi shku në Urgjencën në Prishtinë. Aty dalshin disa shenja të kancerit, të tumorit, lloj-lloj shenjash. Kemi shku në Emergjencën e Prishtinës. Ata na dërgun te mjeku i gastrologjisë, te Hekuran Dibrani. Ai na pranoi. Jam shumë mirënjohës ndaj tij. Aty kanë vazhdu me terapi, me kamera në zorrën e trashë, me mushkëri, ma kanë fotografu lukthin, mëlçinë, veshkat. Nuk kanë lënë analizë pa ma bë", deklaron ai.
Ekzaminimet ishin të gjata dhe një pjesë e tyre me rrezatim. Mjekët specialistë kontrolluan pjesë pas pjese trupin e tij për të verifikuar nëse gjetja e rezonancës qëndronte. Në ditën e nëntë të qëndrimit në QKUK ata konstatuan se Halimi nuk kishte shenja kanceri dhe i kërkuan të rikontrollonte edhe një herë raportin e klinikës private.
"Një ditë para se me u liru nga spitali, u dal që nuk janë ato shenja të tumorit qysh i kanë cekur këta në raport. I kanë thënë djalit: 'Shko në Aloka edhe një herë'. Prej datës 05.08.2026 deri më datën 14.08.2026 kam qëndruar shtrirë në spital", rrëfen Halimi.
Djali i tij u kthye te klinika. "Kur e kanë printu raportin, kanë dalë me raport tjetër, ka dalë ndryshim i madh, diagnoza të tjera krejt. Këto diagnoza që m'i kanë dhënë janë të një pacienti tjetër, me emrin e njëjtë. Djali ka kërku në 'Aloka' që t'ia japin numrin e pacientit që ta ftoj me i marrë rezultatet, nuk ia kanë dhënë. Mjekët e kanë konstatu që unë jam vetëm i maltretuar nga 'Aloka'", thotë Halimi.
Klinika private, e kontaktuar për pretendimet e pacientit, nuk e mohon se atë ditë ishin trajtuar dy persona me të njëjtin emër, por ngarkon me përgjegjësi verifikimin nga vetë pacienti. "Më datë 03.08.2026, në Spitalin ALOKA janë paraqitur dy pacientë të ndryshëm me emrin dhe mbiemrin Enver Halimi. Njëri prej tyre ka kryer MRI të shtyllës lumbosakrale, ndërsa personi tjetër ka kryer MRI të abdomenit dhe pelvikut. Çdo raport radiologjik i lëshuar nga institucioni ynë përmban në pjesën e sipërme të dokumentit të dhënat identifikuese të pacientit, përfshirë datën e lindjes dhe adresën, si dhe llojin e ekzaminimit të kryer. Në dokument, data e lindjes dhe adresa nuk përputhen me të dhënat e z. Enver Halimi për të cilin na keni kontaktuar, pasi bëhet fjalë për një person tjetër me të njëjtin emër dhe mbiemër", përgjigjet klinika.
Rasti u trajtua në emisionin hulumtues "Kallxo Përnime". Në thelb të tij qëndron një detaj i thjeshtë administrativ: dy pacientë me emër e mbiemër identik, dy ekzaminime krejtësisht të ndryshme dhe një raport që përfundoi te personi i gabuar, me pasojë dhjetë ditë shtrimi spitalor dhe një sërë analizash për një sëmundje që nuk ekzistonte.
Pushime të ndërprera, togje rezervë nga gjashtë qytete, patrulla para ambasadave dhe një ekip zjarrfikësish në parkingun e EULEX-it: plani operacional i Policisë së Kosovës për ditën kur Dhomat e Specializuara pritet të shpallin aktgjykimin ndaj Thaçit, Veselit, Krasniqit dhe Selimit.
