Delegacioni i NATO-s te Kurti: FSK-ja dhe anëtarësimi në Aleancë në qendër të takimit

Masa të shtuara sigurie rrethuan ndërtesën e Qeverisë së Kosovës gjatë vizitës së një delegacioni prej 11 anëtarësh të Komisionit për Politikë të Asamblesë Parlamentare të NATO-s. Parlamentarët, që vijnë nga nëntë shtete të ndryshme, u pritën nga kryeministri i Kosovës, Albin Kurti.

Vetë Kurti e bëri publik takimin përmes një postimi në Facebook. "Sot pata nderin dhe kënaqësinë të pres në Zyrën e Kryeministrit delegacionin, prej 11 anëtarësh nga 9 shtete të ndryshme, të Komisionit për Politikë të Asamblesë Parlamentare të NATO-s, me të cilët biseduam për bashkëpunimin dhe rrugën përpara", shkroi ai.

Sipas kryeministrit, bisedimet prekën një gamë të gjerë temash, nga politika e brendshme te mbrojtja. "Diskutuam për përparimin demokratik dhe zhvillimin e vazhdueshëm ekonomik, për situatën e sigurisë në vend dhe rajon, sikurse për ngritjen e kapaciteteve mbrojtëse të Forcës së Sigurisë së Kosovës dhe aftësimin profesional të ushtarakëve tanë, në përputhje me politikat dhe standardet e Aleancës së Atlantikut të Veriut", deklaroi Kurti.

Në të njëjtin postim, ai e vendosi qartë synimin e Prishtinës drejt Aleancës: "Për Republikën e Kosovës anëtarësimi në NATO është prioritet strategjik, që i shërben paqes së qëndrueshme dhe sigurisë afatgjatë të Ballkanit Perëndimor dhe mbarë Evropës."