Bubaveci në zi: sot varroset polici Altin Kryeziu, që humbi jetën në krye të detyrës

Fshati Bubavec i Malishevës pret sot arkivolin e njërit prej banorëve të vet. Zyrtari policor Altin Kryeziu, i cili u godit nga një veturë derisa ishte duke kryer detyrën zyrtare, varroset sot në varrezat e fshatit, në një ceremoni që nis nga ora 17:00.

Kryeziu ndërroi jetë në Qendrën Klinike Universitare të Kosovës, ku po trajtohej pas aksidentit të trafikut që ndodhi disa ditë më parë në Malishevë. Pavarësisht kujdesit mjekësor, ai nuk arriti t'u mbijetojë plagëve të rënda.

Në njoftimin mortor, familja e përshkroi atë si djalë, polic dhe njeri që la pas kujtime, dhimbje dhe respekt. "Në këtë ditë të rëndë, do t'i japim lamtumirën e fundit Altinit, djalit, policit dhe njeriut që la pas kujtime, dhimbje e respekt të pashlyeshëm. U prehsh në paqe, Altin. Lavdi jetës dhe veprës tënde!", thuhet në njoftimin e familjes.

Vdekja e tij ka prekur thellë familjarët, kolegët dhe komunitetin. Sot në Bubavec pritet të mblidhen familjarë, miq, kolegë dhe qytetarë të shumtë, për t'i dhënë lamtumirën e fundit zyrtarit policor.