BMW X6 e kërkuar nga Gjermania sekuestrohet në Pejë – por i kthehet pronarit gjerman

Një veturë e markës "BMW X6", e vendosur në kërkim ndërkombëtar nga autoritetet gjermane, u sekuestrua në Pejë, për t'iu kthyer më pas pronarit të saj, një shtetasi gjerman. Rastin e ka bërë të ditur Prokuroria Themelore në Pejë.

Sipas prokurorisë, operacioni u zhvillua në bashkëpunim me Policinë e Kosovës dhe me Ekipin për Hetimin e Autokrimeve. Informacioni për automjetin ishte pranuar përmes zyrës së ILECU-së, pasi në Gjermani ishte nisur një procedurë penale ndaj një shtetasi kosovar, i identifikuar me inicialet Sh.Q., nën dyshimin për veprën penale "Shpërdorimi i pasurisë së huaj".

Pas lokalizimit të veturës, ajo u sekuestrua më 7 gusht 2026, ndërsa Prokurori i Shtetit lëshoi urdhër për ndalimin e përkohshëm të saj. Shtatë ditë më vonë, më 14 gusht, pas kryerjes së veprimeve procedurale, i njëjti urdhëroi që automjeti t'i kthehej pronarit, shtetasit gjerman të shënjuar me inicialet R.D.

"Më datë 07.08.2026, pas lokalizimit të automjetit, është realizuar sekuestrimi i tij, ndërsa Prokurori i Shtetit ka lëshuar urdhër për ndalimin e përkohshëm të automjetit. Pas ndërmarrjes së veprimeve të nevojshme procedurale, më datë 14.08.2026, Prokurori i Shtetit ka lëshuar urdhër për kthimin e automjetit te pronari i tij, shtetasi gjerman R.D. Prokuroria Themelore në Pejë mbetet e përkushtuar në bashkëpunimin ndërinstitucional dhe ndërkombëtar, me qëllim të trajtimit efikas të rasteve penale dhe zbatimit të ligjit", njoftoi prokuroria.

Prokuroria nuk dha arsye konkrete për vendimin që çoi te kthimi i automjetit, duke u mjaftuar me shpjegimin se ai u mor pas përfundimit të veprimeve procedurale.