Rrahja e 12-vjeçares në Mitrovicë, KOMF kërkon reagim urgjent institucional

Rasti i dhunës ndaj një vajze 12-vjeçare në Mitrovicë ka kaluar tashmë nga rrjetet sociale në tryezën e institucioneve. Koalicioni i OJQ-ve për Mbrojtjen e Fëmijëve, KOMF, ka shprehur shqetësim të thellë lidhur me pamjet e publikuara në media, ku vajza 12-vjeçare shihet duke u dhunuar nga një vajzë 18-vjeçare, dhe kërkon veprim të menjëhershëm nga institucionet e rendit dhe të drejtësisë.

Sipas KOMF-it, dhuna ndaj fëmijëve nuk mund të trajtohet thjesht si një incident i izoluar. Përveç vetë aktit, koalicioni e cilëson shqetësues faktin se dhuna është filmuar dhe është bërë publike, çka mund ta rëndojë më tej gjendjen e viktimës, duke rritur rrezikun e stigmatizimit, ritraumatizimit dhe cenimit të privatësisë së saj.

Kërkesa e parë e koalicionit është aktivizimi i menjëhershëm i mekanizmave të mbrojtjes së fëmijëve në nivel lokal, përfshirë Qendrat për Punë Sociale dhe shërbimet psiko-sociale, me qëllim mbrojtjen, mbështetjen dhe rehabilitimin e viktimës. Njëkohësisht, KOMF kërkon masa të menjëhershme nga institucionet përgjegjëse të rendit dhe drejtësisë ndaj personave të përfshirë, në përputhje me legjislacionin në fuqi dhe duke pasur në qendër interesin më të mirë të fëmijës.

Koalicioni kërkon edhe fuqizimin e shërbimeve dhe programeve parandaluese ndaj dhunës: mbështetje për familjet, edukim në shkolla, mbështetje për shëndetin mendor të fëmijëve dhe të rinjve, si dhe programe që promovojnë respektin, tolerancën dhe zgjidhjen paqësore të konflikteve. KOMF kujton se edhe më parë ka theksuar se sistemi i mbrojtjes së fëmijëve përballet me mangësi të mëdha në parandalimin, identifikimin e hershëm dhe mbrojtjen e fëmijëve nga dhuna, dhe se përmasat që ka marrë kjo dukuri kërkojnë një fokus shumë më të madh në parandalim dhe edukim, përmes fuqizimit të prindërve për rritje dhe disiplinim pa dhunë, edukimit në shkolla dhe ndërhyrjes së hershme ndaj sjelljeve të rrezikshme.

"Parandalimi i dhunës duhet të jetë përgjegjësi e përbashkët e familjes, shkollës, institucioneve dhe shoqërisë në tërësi. Vetëm përmes ndërhyrjes së hershme dhe fuqizimit të mekanizmave të mbrojtjes mund të ndërpritet cikli i dhunës dhe bartja e saj nga një gjeneratë në tjetrën", thekson KOMF, duke u bërë thirrje institucioneve të veprojnë me urgjencë dhe me ndjeshmëri të plotë ndaj viktimës, duke garantuar mbrojtjen e dinjitetit, privatësisë dhe të drejtave të fëmijës.

Reagimi vjen pas arrestimit të 18-vjeçares nga Policia e Kosovës në Mitrovicë të Jugut, nën dyshimin se ka sulmuar fizikisht vajzën 12-vjeçare. Sipas policisë, e dyshuara është identifikuar dhe arrestuar pas sigurimit të provave materiale, përfshirë një videosekuencë të publikuar në rrjetet sociale, në të cilën shihet momenti kur ajo e sulmon dhe e rrah të miturën.

Pas incidentit, 12-vjeçarja ka kërkuar tretman mjekësor. Pas intervistimit, me vendim të prokurorit kompetent, të dyshuarës i është caktuar masa e ndalimit policor për 48 orë. Rasti është iniciuar si "Lëndim i lehtë trupor" dhe po hetohet në koordinim me Prokurorinë.