Armë, municion e uniforma të konfiskuara në veri: Policia zbardh operacionet për krime lufte

Një sasi e konsiderueshme armësh, municioni dhe uniformash është gjetur dhe konfiskuar gjatë një sërë operacionesh policore në veri të Mitrovicës. Materialet do të ekspozohen sot para mediave në një konferencë të jashtëzakonshme që Policia e Kosovës e ka caktuar për orën 16:00.

Konferenca mbahet në Qendrën e Njësive Speciale "Enver Zymeri" në Mitrovicë, të mërkurën më 20 gusht 2026. Sipas njoftimit të Policisë, përveç armëve, municionit dhe uniformave, janë siguruar edhe dëshmi të tjera relevante që do të paraqiten para gazetarëve.

Operacionet lidhen me rastin e njohur si "Krimet e Luftës ndaj Popullatës Civile". Në kuadër të këtij rasti, sipas Policisë, po zhvillohen veprime në disa lokacione të dyshuara në Zubin Potok.

Në konferencë pritet të marrin pjesë ministri i Punëve të Brendshme, Xhelal Sveçla, dhe drejtori i Përgjithshëm i Policisë së Kosovës, kolonel Gazmend Hoxha, të cilët do të japin detaje mbi rrjedhën e operacioneve dhe materialet e sekuestruara.