Apeli anulon 13 vjet e 11 muaj burg për Labeat Kastratin, rasti i vitit 2001 kthehet sërish në rigjykim

Gjykata e Apelit e Kosovës ka anuluar aktgjykimin me të cilin Labeat Kastrati ishte dënuar me 13 vjet e 11 muaj burgim për vrasje dhe vrasje në tentativë, duke urdhëruar që çështja ndaj tij dhe dy të akuzuarve të tjerë, Fahri Kajtazit dhe Hamdi Mavriqit, të kthehet sërish në rigjykim.

Vendimi është marrë më 7 korrik nga kolegji i Departamentit për Krime të Rënda, i kryesuar nga gjyqtarja Kadrije Goga Lubishtani, me anëtarë Valbona Musliu-Selimaj dhe Arben Hoti.

Kastrati ishte shpallur fajtor nga Gjykata Themelore në Prishtinë. Për veprën e vrasjes ishte dënuar me 11 vjet burgim, ndërsa për vrasje në tentativë me 4 vjet, që kishin sjellë një dënim unik prej 13 vjet e 11 muaj.

Por ky aktgjykim nuk e ka kaluar filtrin e shkallës më të lartë. Kolegji i Apelit ka aprovuar si të bazuara ankesat e mbrojtësve të të akuzuarve, duke konstatuar se vendimi i shkallës së parë është përfshirë nga shkelje esenciale të dispozitave të procedurës penale dhe se për faktet vendimtare mungojnë arsyet e mjaftueshme, të qarta dhe konkrete.

Në këtë proces, Kastrati mbrohet nga avokati Besnik R. Berisha, i cili kishte kërkuar rrëzimin e aktgjykimit të shkallës së parë. Në ankesë, Berisha kishte ngritur pretendime për shkelje esenciale të procedurës penale, shkelje të ligjit penal, vërtetim të gabuar dhe jo të plotë të gjendjes faktike, si dhe për vendimin mbi sanksionin penal. Mbrojtja kishte kërkuar që Kastrati të lirohej nga akuza për vrasje në tentativë ose, alternativisht, që aktgjykimi të anulohej dhe çështja të kthehej në rigjykim. Apeli ka zgjedhur pikërisht këtë alternativë të dytë.

Një prej pikave kyçe që Apeli kërkon të sqarohet lidhet me vetë dinamikën e të shtënave dhe përgjegjësinë individuale të secilit të përfshirë. Gjykata ka kërkuar që në rigjykim, gjatë rikonstruktimit të vendit të ngjarjes, të shqyrtohet angazhimi i një eksperti të balistikës ose të një fushe tjetër përkatëse, në mënyrë që të përcaktohen pozita e qitësit dhe e viktimës, trajektorja e të shtënave dhe se cili prej të akuzuarve e ka goditur viktimën. Pa u sqaruar këto fakte, sipas Apelit, vendimi i shkallës së parë mbetet "i mangët dhe i paqëndrueshëm".

Rasti lidhet me një ngjarje të ndodhur në dhjetor të vitit 2001 në Prishtinë dhe bart mbi shpinë një histori të gjatë procedurale. Edhe Gjykata Supreme kishte ndërhyrë më herët, duke e kthyer çështjen në rigjykim. Në aktvendimin e fundit, Apeli ka rikujtuar se një prej shkeljeve të konstatuara tani ishte evidentuar edhe nga Gjykata Supreme që në vitin 2009, por nuk ishte eliminuar siç duhej gjatë rigjykimit të mëvonshëm.

Pavarësisht anulimit të dënimit, Kastrati nuk është liruar nga paraburgimi. Gjykata e Apelit ka vendosur që kjo masë të vazhdojë, me vlerësimin se kushtet ligjore për të ende ekzistojnë, dhe ai do të qëndrojë në paraburgim deri në një vendim tjetër të Gjykatës Themelore në Prishtinë.