Alarm për armë në një lokal në Ferizaj: policia zbret në terren, gjen vetëm një sprej

Një njoftim i mbërritur përmes një aplikacioni celular, se në një kafiteri të Ferizajt ishin mbledhur rreth 10 persona dhe se mund të kishte armë, vuri në lëvizje policinë në orët e para të mëngjesit të 18 gushtit.

Rreth orës 03:10, njësitet policore dolën te kafiteria "Eclipse", në rrugën "12 Qershori", ku kontrolluan personat e pranishëm dhe hapësirat e lokalit. Gjatë kontrollit nuk u raportua se ishte gjetur ndonjë armë zjarri.

Në banakun e lokalit u gjet një sprej OC, për të cilin u konstatua se i përkiste pronarit të kafiterisë. Sipas informacioneve, pronari është U. T., rreth 36-vjeç, i cili u arrestua dhe u shoqërua në Stacionin Policor në Ferizaj për intervistim. Spreji u konfiskua.

Për rastin u njoftua prokurori kujdestar. Me udhëzim të tij, ndaj U. T. u iniciua rasti nën cilësimin "Mbajtja në pronësi, kontroll ose posedim i armës". Pas përfundimit të procedurave policore, 36-vjeçari u lirua në procedurë të rregullt, ndërsa hetimet do të vazhdojnë sipas procedurave përkatëse.

Personat e përmendur prezumohen të pafajshëm derisa fajësia e tyre të mos provohet me vendim të formës së prerë nga gjykata.