Aksion kundër fajdesë në Prizren: i dyshuari ikën me makinë, godet një këmbësor dhe arrestohet

Një operacion i policisë kundër fajdesë në Prizren u kthye në përndjekje rrugore, pasi njëri nga personat e dyshuar u ngjit në automjet dhe u largua nga vendi i ngjarjes. Gjatë ikjes, sipas policisë, ai goditi një këmbësor dhe shkaktoi dy aksidente, para se të arrestohej së bashku me automjetin.

Aksioni u zhvillua gjatë ditës. Policia e Kosovës konfirmoi se bëhet fjalë për një veprim kundër disa personave që dyshohen se merren me fajde në rajonin e Prizrenit.

Zëdhënësi i Policisë për rajonin e Prizrenit, Shaqir Bytyqi, dha detaje mbi rrjedhën e ngjarjes. "Gjatë ditës së sotme ka qenë një aksion kundër disa personave që dyshohen se janë marrë me fajde. Në aksionin e sipërpërmendur, njëri prej këtyre personave ka qenë në automjet dhe ka ikur nga vendi i ngjarjes", tha ai.

Sipas Bytyqit, largimi i të dyshuarit shkaktoi dëme të tjera në rrugë. "Kur ka ikur nga vendi i ngjarjes, ka shkaktuar dy aksidente, ku një këmbësor e ka goditur në rrugë dhe më pas ka shkaktuar edhe një aksident tjetër", theksoi ai.

I dyshuari u ndalua më pas nga policia. "I dyshuari, së bashku me automjetin, është arrestuar, ndërsa Policia është duke u marrë me rastin", tha zëdhënësi. Hetimet për rastin vazhdojnë.