"A hala jeni gjallë?": dëshmitari rrëfen për "kordonin" e gardianëve në Burgun e Lipjanit

Një radhë gardianësh, të vendosur nga njëri-tjetri në distancë prej rreth një deri në një metër e gjysmë, dhe të burgosurit që detyroheshin të kalonin mes tyre nën goditje. Kështu e ka përshkruar dëshmitari Ali Gjyliqi para trupit gjykues të ashtuquajturin "kordon" në Burgun e Lipjanit, në procesin gjyqësor ndaj Boban Toniqit, të akuzuar nga Prokuroria Speciale për krime lufte kundër popullsisë civile.

"Gjatë kalimit kishte rrahje dhe tortura. Kalonim pranë tyre, ishin të vendosur çdo një metër apo një metër e gjysmë. Kishte shumë, ndoshta më shumë se 50 persona", deklaroi Gjyliqi.

Sipas rrëfimit të tij, nëpër këtë radhë nuk kurseheshin as ata që nuk mund të mbroheshin. "Madje edhe të plagosurit kalonin andej", shtoi dëshmitari.

Gjyliqi tregoi se nuk kishte lëvizur shpejt gjatë kalimit nëpër kordon dhe se disa nga gardianët i kishin njohur të burgosurit. "Disa gardianë na kanë njohur. Bile, njëri prej tyre na pyeti: 'A hala jeni gjallë?'", deklaroi ai para trupit gjykues.

Në fund të dëshmisë, ai i kërkoi gjykatës dënimin e të akuzuarit: "Pres që të shpallet fajtor dhe të dënohet, sepse mjaft padrejtësi na janë bërë deri më tani".

Toniqi akuzohet nga Prokuroria Speciale për krime lufte kundër popullsisë civile. Pretendimet e paraqitura nga dëshmitari nuk janë provuar në gjykatë. Personat e apostrofuar prezumohen të pafajshëm derisa fajësia e tyre të mos provohet me vendim të formës së prerë nga gjykata.