74 milionë euro në pikëpyetje: Pa nënshkrimin e Financave, humbin 100 kamionë e 10 mijë kontejnerë

Një projekt prej rreth 74 milionë eurosh për modernizimin e menaxhimit të mbeturinave në Rajonin e Prishtinës rrezikon të mbetet në letër. Ndërmarrja publike KRM "Pastrimi" ka njoftuar se ka pranuar informacion zyrtar për mosvazhdimin e procedurave për fillimin e grantit, pasi Ministria e Financave, sipas saj, nuk ka proceduar me nënshkrimin e marrëveshjeve të financimit me Bankën Gjermane për Zhvillim (KfW).

Në thelb të paketës që tani vihet në pikëpyetje janë investime shumë konkrete: ndarja e mbeturinave në burim dhe zhvillimi i sistemit të riciklimit, blerja e mbi 100 kamionëve të rinj, rreth 10 mijë kontejnerëve të rinj, si dhe investime kapitale në objekte dhe infrastrukturë për gjashtë komuna. Projekti, i financuar përmes Bashkimit Evropian dhe KfW-së, prek drejtpërdrejt mbi 500 mijë qytetarë dhe biznese, të cilëve "Pastrimi" u ofron shërbimin e grumbullimit të mbeturinave.

Ndërmarrja thekson se nuk bëhet fjalë për një ide në fazë fillestare. Rreth 24.1 milionë euro nga vlera e përgjithshme janë të zotuara prej më shumë se dy vitesh, ndërsa projekti është përgatitur dhe zhvilluar për një periudhë të gjatë, çka, sipas saj, e bën një proces të avancuar. Mosnënshkrimi i marrëveshjeve, paralajmëron "Pastrimi", nuk do të sillte vetëm shtyrje të procedurave, por edhe rrezik për humbjen e investimeve të planifikuara.

Në njoftimin e saj, ndërmarrja publike ka renditur edhe atë që e paraqet si ecuri të vetën gjatë viteve të fundit: përmirësim i menaxhimit financiar dhe operativ, kalim nga një bilanc negativ në bilanc pozitiv operativ dhe përmirësime në vlerësimet e pasqyrat e auditimit nga Zyra Kombëtare e Auditimit.

Një mosrealizim eventual i projektit, vlerëson "Pastrimi", do të ishte goditje jo vetëm për ndërmarrjen, por edhe për qytetarët, institucionet dhe partnerët ndërkombëtarë të përfshirë në përgatitjen e tij. Prandaj ka kërkuar angazhim institucional dhe bashkëpunim me partnerët ndërkombëtarë për të gjetur një zgjidhje që do të mundësonte vazhdimin e projektit. Ministria e Financave dhe KfW-ja ende nuk kanë reaguar publikisht ndaj këtij paralajmërimi.