61 tiketa për një javë: Njësia e Motoçikletave shtrëngon kontrollet në Rajonin e Ferizajt

Gjatë javës së kaluar, patrullat me motoçikleta të Policisë kanë shqiptuar 61 tiketa për kundërvajtje në trafik në Rajonin e Ferizajt, në një varg kontrollesh që synojnë uljen e rrezikut në rrugë.

Njësia e Motoçikletave, që vepron në kuadër të Njësisë së Komunikacionit Rrugor, mbulon tërë territorin e rajonit, përfshirë komunat Ferizaj, Kaçanik, Shtime, Shtërpcë dhe Hani i Elezit.

Nga totali i masave, 12 janë shqiptuar për mosrespektim të shenjave të trafikut dhe 8 për përdorim të telefonit gjatë drejtimit të automjetit. Shtatë të tjera lidhen me mosmbajtjen e distancës së sigurisë, ndërsa 5 masa u janë dhënë shoferëve të kamionëve për shkelje të rregullave të peshores. Pjesa më e madhe, 29 masa, u përkasin kundërvajtjeve të tjera.

Policia Rajonale e Ferizajt u bëri thirrje të gjithë pjesëmarrësve në trafik të respektojnë rregullat dhe shenjat e komunikacionit, të mbajnë distancën e sigurisë dhe të shmangin përdorimin e telefonit gjatë vozitjes.