55 raste të shtënash festive për dy muaj, konfiskohen 47 armë zjarri

Armë të shkrepura në ajër gjatë dasmave dhe ahengjeve familjare mbetën një dukuri e përhapur në Kosovë edhe këtë verë. Gjatë muajve qershor dhe korrik të këtij viti, Ministria e Punëve të Brendshme (MPB) bëri të ditur se u raportuan 55 raste të të shtënave festive në të gjithë vendin.

Në kuadër të fushatës "Festo me zemër, jo me armë", Policia e Kosovës ka ndërmarrë veprime në të gjitha rastet e raportuara. Si rezultat, 48 persona janë shoqëruar nga policia, ndërsa janë konfiskuar gjithsej 47 armë zjarri.

Sipas ministrisë, raportimet lidhen kryesisht me të shtënat gjatë dasmave dhe ahengjeve familjare. MPB-ja ka falënderuar qytetarët që kanë raportuar rastet dhe i ka inkurajuar të vazhdojnë të lajmërojnë keqpërdorimin e armëve, me qëllim parandalimin e kësaj praktike.

Qëllimi i fushatës, thekson ministria, është rritja e vetëdijes për rrezikun e keqpërdorimit të armëve dhe krijimi i një ambienti më të sigurt gjatë festimeve familjare.