4.4 milionë euro për 78 banesa në Skenderaj, prioritet familjet e dëshmorëve

Skenderaj do të ketë 78 banesa të reja sociale. Vlera e projektit është 4.4 milionë euro dhe përparësi për t'u strehuar në to do të kenë familjet e dëshmorëve të komunës.

Marrëveshja u nënshkrua nga kryetari i Komunës së Skenderajt, Sami Lushtaku, dhe ministrja Fitore Pacolli, e cila njoftoi sot për memorandumin e bashkëpunimit. "4.4 milionë euro është projekti i realizimit për Banim Social Adekuat në Skënderaj, ku bashkë me kryetarin e Komunës, Sami Lushtaku, nënshkruam memorandumin e bashkëpunimit", tha Pacolli.

Ndarja e barrës financiare është e përcaktuar: "Investimi i përgjithshëm kap vlerën prej 4.4 milionë eurosh, prej të cilave 3.4 milionë euro do të financohen nga MMPH, ndërsa 1 milion euro nga Komuna e Skenderajt", sipas ministres. Financimi është siguruar përmes Bankës Zhvillimore të Këshillit të Evropës.

Banesat do të kenë tri madhësi të ndryshme. "Në kuadër të projektit do të ndërtohen 78 banesa për Skënderajin, me sipërfaqe prej 75 m², 82.5 m² dhe 93.5 m², të përshtatura për nevojat e familjeve përfituese", theksoi Pacolli, duke e cilësuar projektin si "banim dinjitoz dhe kushte më të mira jetese për qytetarët e Skenderajt".

Marrëveshja për Financimin e Programeve të Banimit ka të bëjë me bashkëfinancimin e Objektit Ç dhe është pjesë e programit për Banimin Social Adekuat. Sipas njoftimit, projekti synon të ofrojë zgjidhje banimi për familjet e dëshmorëve të Komunës së Skenderajt dhe të përmbushë një obligim institucional ndaj tyre.

Komuna ka bërë të ditur se synon të realizojë edhe Objektin K, me qëllim të kompletimit të kompleksit UÇK.