3.3 milionë euro për banim social në Mitrovicë: 36 banesa të reja dhe renovime

Tridhjetë e gjashtë banesa të reja dhe një varg renovimesh për familjet në nevojë, ky është premtimi i marrëveshjes së nënshkruar sot për Mitrovicën. Komuna do të përfitojë 3.3 milionë euro nga Qeveria e Kosovës për realizimin e Projektit të Banimit Social Adekuat.

Marrëveshja për grantin u nënshkrua mes kryetarit të Mitrovicës, Faton Pacolli, dhe ministres në detyrë të Mjedisit dhe Planifikimit Hapësinor, Fitore Pacolli-Dalipi. "Sot, së bashku me ministren e Mjedisit dhe Planifikimit Hapësinor, Fitore Pacolli Dalipi, nënshkruam marrëveshjen e Grantit në kuadër të Projektit të Banimit Social Adekuat, në vlerë prej 3.3 milionë eurosh", ka shkruar Pacolli.

Sipas kryetarit të komunës, projekti synon mbështetjen e familjeve që kanë më së shumti nevojë dhe përfshin disa ndërhyrje në fushën e banimit social. Përveç ndërtimit të 36 njësive të reja të banimit, parashihet edhe renovimi i njësive ekzistuese të banimit social, si dhe renovimi e rindërtimi i shtëpive private për familjet e cenueshme.

Pacolli falënderoi ministren në detyrë për bashkëpunimin: "Falënderoj ministren Fitore Pacolli Dalipi për bashkëpunimin dhe mbështetjen e dhënë". Ai e mbylli deklaratën me qëndrimin se "Mirëqenia e qytetarëve është prioriteti ynë qeverisës".