Inspektorët e tregut ndalin 16 mijë lodra "Slime" në bashkëpunim me Doganat

Gjashtëmbëdhjetë mijë lodra të llojit "Slime", të vlerësuara si të pasigurta, janë ndaluar të hyjnë në tregun e Kosovës. Ky është rezultati më i dukshëm i një jave kontrollesh nga Inspektorati Qendror i Mbikëqyrjes së Tregut.

Lodrat u ndalën pas shtatë inspektimeve të përbashkëta me Doganat e Kosovës, të zhvilluara në kuadër të aksioneve të planifikuara me projektin e GIZ-it. Sipas Inspektoratit, qëllimi është që produktet e pasigurta të mos dalin në shitje dhe që konsumatorët, sidomos fëmijët, të mbrohen.

Gjatë javës së fundit inspektorët kryen gjithsej 149 inspektime, si në tregun e brendshëm ashtu edhe në zonat doganore. Kontrollet u përqendruan te siguria e produkteve, mbikëqyrja e çmimeve, cilësia dhe konformiteti i mallrave, si dhe zbatimi i legjislacionit në fuqi.

U shqiptuan 18 gjoba. Shkeljet e konstatuara lidhen me mospërputhjen e çmimeve, mungesën e deklaracioneve të produkteve, moskonformitetin e produkteve të ndërtimit dhe mosrespektimin e urdhrave të inspektorëve.

Një kapitull më vete ishte tregtia e metaleve të çmuara. Për mungesë të dokumentimit të shenjëzimit u shqiptuan tetë gjoba, ndërsa u bllombuan 3,892.13 gramë metale të çmuara, pra afro katër kilogramë.

Inspektorët kontrolluan gjithashtu sektorin e naftës dhe të derivateve të saj, mjetet matëse dhe njehsorët elektrikë, peshën e bukës në furra, produktet kozmetike, produktet e ndërtimit dhe udhërrëfyesit turistikë.

Nga 149 lëndët e hapura, 77 janë mbyllur. 72 të tjera mbeten në procedurë, sepse subjekteve u është kërkuar dokumentacion shtesë ose duhet të eliminojnë parregullsitë e gjetura. Brenda së njëjtës periudhë u kryen edhe 16 riinspektime.

Ministria e Industrisë, Ndërmarrësisë, Tregtisë dhe Inovacionit ka paralajmëruar se, përmes Inspektoratit, kontrollet e rregullta do të vazhdojnë, me synimin për të parandaluar shkeljet dhe për të garantuar një treg më transparent për konsumatorët.