151 raste me fruth në pesë muaj: mbi 95% e të infektuarve pa asnjë dozë vaksine

Numri i rasteve me fruth në Kosovë është në rritje. Sipas të dhënave të Institutit Kombëtar të Shëndetësisë Publike (IKSHPK), brenda pesë muajve, nga 16 prilli deri më 30 gusht, janë konfirmuar 151 raste me këtë sëmundje ngjitëse.

Të dhënat e institutit nxjerrin një element kyç: mbi 95 për qind e rasteve të konfirmuara janë te persona të pavaksinuar.

Paralelisht, gjatë periudhës janar-gusht janë vaksinuar 8 mijë e 540 fëmijë. Shefja e vaksinimit në Qendrën Kryesore të Mjekësisë Familjare (QKMF) në Prishtinë, Xhevrie Canolli, e ka zbërthyer këtë shifër sipas grupmoshave në një deklaratë për agjencinë KosovaPress.

"Nga muaji janar i këtij viti deri më sot janë vaksinuar kundër fruthit 2500 fëmijë të grupmoshës 1 deri 5 vjeç, 2900 fëmijë të grupmoshës 5 deri 7 vjeç (këtu hyjnë fëmijët parashkollorë dhe ata që këtë vit do të regjistrohen në klasë të parë) dhe 3140 nxënës të klasës së parë, të cilët gjithashtu vaksinohen kundër fruthit me dozën e dytë, ndërsa doza e parë aplikohet në moshën njëvjeçare", tha Canolli.

Sipas saj, mbrojtja nga sëmundja nuk ka alternativë tjetër të njohur, sepse pasojat e fruthit mund të jenë të rënda.

"Vaksinimi është mënyra më e sigurt dhe më efektive në parandalimin e përhapjes së mëtejshme të fruthit në vendin tonë. Marrë parasysh komplikimet serioze shëndetësore që mund të shkaktojë fruthi, si pneumonia, otiti që mund të komplikohet edhe me humbje të përhershme të dëgjimit, pastaj encefaliti apo inflamacioni i trurit, që në raste të rënda mund të lërë pasojë të përhershme apo edhe të shkaktojë vdekje, atëherë përfitimi nga vaksinimi është shumë më i madh sesa rreziku nga efektet e mundshme anësore", deklaroi ajo.

Efektet anësore të vaksinës, sipas Canollit, janë të lehta: temperaturë e lehtë, lodhje, humbje e oreksit dhe plogështi, ndërsa në vendin e injektimit mund të shfaqet një ënjtje e lehtë dhe skuqje, që kalojnë brenda një deri në dy ditë.

Thirrja e saj për prindërit dhe kujdestarët e fëmijëve është konkrete: të hapin kartelat e vaksinimit dhe të veprojnë pa vonesë.

"Duke qenë se fruthi është sëmundje shumë ngjitëse dhe përhapet shpejt në komunitet, u bëj thirrje prindërve, kujdestarëve të fëmijëve, të kontrollojnë kartelat e vaksinimit dhe, në rast se u mungon vaksina kundër fruthit, t'i dërgojnë sa më parë për vaksinim në qendrat më të afërta të mjekësisë familjare, të mos bien pre e dezinformatave dhe teorive konspirative rreth efekteve anësore të paverifikuara shkencërisht", përfundoi Canolli.

Të njëjtin apel ka bërë edhe Instituti Kombëtar i Shëndetësisë Publike, duke potencuar se vaksinimi është mbrojtja më e mirë. Krahas shifrave të rasteve të konfirmuara, interesimi i prindërve për vaksinimin e fëmijëve nuk vlerësohet i ulët.