Vrasja me sopatë në Vitomiricë: gruaja e tetë e vrarë në Kosovë këtë vit

Në Vitomiricë të Pejës, një grua me inicialet A.Z. u vra me sopatë. Sipas raportimeve, autori i vrasjes dyshohet të jetë kunati i saj. Nuk dihet ende nëse i dyshuari është arrestuar.

Me këtë rast, numri i grave të vrara në Kosovë gjatë vitit 2026 nga partnerët, ish-partnerët apo familjarët e tyre arrin në tetë.

Vrasja në Vitomiricë ndodh në një kohë kur shifrat zyrtare tregojnë se dhuna brenda familjes mbetet e përhapur. Sipas të dhënave të Policisë së Kosovës, brenda nëntë muajve, deri në shtator të këtij viti, janë regjistruar 2052 raste të dhunës në familje. Në 1626 prej tyre, viktima ka qenë grua.

Gjatë gjithë vitit 2025, policia kishte regjistruar 2711 raste të dhunës në familje, ku 1931 viktima ishin femra.

Juristi Anton Nrecaj thekson se përgjegjësia për ta ndalur dhunën nuk bie vetëm mbi viktimat. "Sipas ligjit në fuqi, nuk është e domosdoshme patjetër vetëm viktimat ta raportojnë dhunën, por edhe personat e tjerë, të cilët e shohin dhunën, e kanë obligim ligjor dhe detyrim ligjor që ta raportojnë. Andaj, qysh nga policia, në momentin kur një viktimë e adreson, raporton rastin në polici, policia e ka për obligim që t’i marrë të gjitha veprimet ligjore", tha ai.

Sipas Nrecajt, kur rreziku vlerësohet i lartë, institucionet duhet të shkojnë më tej, deri te konfiskimi i armëve që mund t'i përdorë dhunuesi. "Sipas detyrës zyrtare, menjëherë rastet e dhunës në familje konsiderohen edhe si vepra penale …, natyrisht se do të duhej që nëse niveli i rrezikshmërisë, po thuhet që është i lartë, prokuroria të ndërmarrë bashkëpunim me policinë veprime të bastisjes dhe të konfiskojë armët me të cilat potencialisht i njëjti dhunuesi mund të kryente vepër penale", shtoi ai.

Sociologu Genx Xerxa i sheh rrënjët e problemit në disa drejtime njëkohësisht: shëndeti mendor, përhapja e drogave, gjendja socio-ekonomike dhe ngadalësia e drejtësisë. "Kemi shëndetin mendor, kemi rritje të madhe të substancave psikoaktive, drogave, të cilat po ndikojnë edhe në mirëqenien dhe jetën, kualitetin brenda familjes, edhe po mundet me qenë një shkaktar i dhunës shtesë. Situata apo mirëqenia jonë socio-ekonomike, e disa faktorë tjerë, të cilat lidhen me socialen, ndoshta edhe me gjyqësinë, me drejtësinë, të cilat në disa raste shumë procese gjyqësore po vonojnë, edhe njerëzit, pastaj, i marrin gjërat si me kanë apo në duart e veta, duke bërë vetëgjyqësi", tha Xerxa.