ReklamëHapësirë reklame
ReklamëHapësirë reklame
Reklamë
Një raport i Zyrës së Kryeprokurorit të Shtetit rindërton muajt para vrasjes në Vitomiricë: arma e raportuar nga viktima nuk u kontrollua kurrë, ndërsa mesazhi kërcënues i shtatorit u la me shënim zyrtar. Në Mitrovicë, protestuesit kërkuan dorëheqje dhe ndjekje penale.
Ilustrim i krijuar me inteligjencë artificiale. Nuk është fotografi e ngjarjes. Si e përdorim AI-në
Më 10 korrik, në Stacionin Policor në Pejë, Arlinda Zekaj u tha hetuesve se ish-bashkëshorti i saj posedonte armë zjarri me leje dhe se ndihej e rrezikuar prej tij. Arma nuk u verifikua asnjëherë. Pas vrasjes së saj, në shtëpinë e ish-bashkëshortit u gjet një armë.
Këto gjetje dalin nga raporti i koordinatorit nacional për dhunën në familje në Zyrën e Kryeprokurorit të Shtetit, prokurorit Ersan Qavolli, të cilin e ka siguruar Betimi për Drejtësi. Dokumenti ndjek hap pas hapi kontaktet e gruas me policinë dhe prokurorinë, në korrik dhe në shtator, dhe tregon se çfarë u bë, apo nuk u bë, pas secilit prej tyre.
Në deklaratën e korrikut, Zekaj tregoi se ish-bashkëshorti, J.S., e kishte kërcënuar me vdekje dhe e kishte nxjerrë nga shtëpia. Për armën ajo ishte e qartë: "Po Jetoni posedon armë zjarri me leje. Jo asnjëherë nuk më ka kërcënuar me armë. Nuk e di ku ndodhet arma. Po shumë e ndjej veten të rrezikuar nga Jetoni."
Sipas Inspektoratit Policor të Kosovës (IPK), hetuesi Qëndrim Sheremeti e njoftoi për deklaratën prokuroren kujdestare Sadije Muriqi, por për armën nuk u ndërmor asgjë. "Përkundër kësaj lidhur me deklarimin se i dyshuari posedon armë, nuk ishte ndërmarrë ndonjë veprim konkret për sekuestrimin e armës", thuhet në raportin e IPK-së.
Qavolli shkruan se arma nuk u kontrollua as në sistem, as në shtëpinë e J.S., dhe se për të gjitha këto rrethana ishte në dijeni edhe kryeprokurorja e Prokurorisë Themelore në Pejë, Lumturije Vuçetaj. "Po ashtu vlerësoj se pavarësisht se arma është raportuar në muajin Korrik 2026, ka qenë dashur që të bëhet një verifikim për këtë armë", përfundon ai. Raporti i referohet Ligjit për armët, sipas të cilit dhuna në familje dhe hetimi penal përbëjnë rrezik për rendin publik dhe mund të jenë bazë për sekuestrimin e armës dhe revokimin e lejes. Ndaj J.S. ishte nisur rast për kanosje që në korrik.
Paralajmërimi i dytë erdhi më 21 shtator. Atë ditë Zekaj u paraqit në nënstacionin policor në Vitomiricë. Ajo deklaroi se nuk kishte qasje në shtëpinë e përbashkët, edhe pse gjykata e kishte urdhëruar ish-bashkëshortin ta lejonte të kthehej, dhe se ai kishte shkuar në Amerikë pa e ditur ajo se kujt ia kishte lënë djalin. Po atë ditë, sipas deklaratës së saj, ai i kishte dërguar në WhatsApp këtë mesazh: "kij kujdes, ki urdhër mbrojtës, mos thuaj çka u ba".
"Në deklarimin e saj Arlinda kishte potencuar se bashkëshorti i saj i dërgonte mesazhe të cilat përbëjnë paralajmërim dhe se kishte frikë nga mundësia e hakmarrjes", shkruhet në raport. Ajo tregoi gjithashtu se policia nuk e kishte kontaktuar kurrë për zbatimin e urdhrit mbrojtës të lëshuar më 7 shtator. "Sipas deklaratës së viktimës, e njëjta deklaron se Policia asnjëherë nuk e kishte kontaktuar të njëjtën për ekzekutimin e urdhrit mbrojtës."
Hetuesi policor Sead Hamzic kontaktoi prokurorin kujdestar Argzon Hasi, i cili, sipas raportit, "kishte udhëzuar që rasti të procedohet me shënim zyrtar". Gruaja u udhëzua të paraqitej të nesërmen në Qendrën për Punë Sociale.
Më 22 shtator, me udhëzim të prokurorëve Hasi dhe Suada Hamza, ndaj J.S. u hap rasti 2026-DA-1274 për dy vepra penale: "Mospërfillje e urdhrit të gjykatës" dhe "Keqtrajtim apo braktisje e fëmijës". Zyrtarët e Qendrës për Punë Sociale konstatuan se ai ishte larguar në SHBA më 5 shtator dhe fëmijën ia kishte besuar vëllait të tij.
Çfarë ndodhi më pas me këtë rast mbetet e paqartë edhe për vetë koordinatorin nacional, i cili nuk arriti të gjejë nëse dosja u dërgua ndonjëherë në prokurori dhe, nëse jo, pse. Në përgjigjen për kryeprokuroren e Pejës, Hasi thotë se e kishte nisur rastin për mospërfillje të urdhrit të gjykatës sepse gruas nuk i lejohej hyrja në shtëpi, ndërsa për çështjen e fëmijës kishte udhëzuar që të kontaktoheshin prokurori për të mitur dhe Qendra për Punë Sociale.
Më 22 tetor J.S. u kthye në Kosovë. Më 23 tetor ndaj tij u ngrit aktakuza në rastin për kanosje. Të dielën, më 25 tetor, Arlinda Zekaj u vra në shtëpinë e saj në Vitomiricë të Pejës.
I dyshuar për vrasjen është ish-kunati i saj, A.S., vëllai i J.S., i cili është arrestuar nga Policia e Kosovës. Sipas raportit të kryeprokurores së Pejës, ai e goditi me një mjet të fortë. Raporti nuk sqaron nëse arma e gjetur në shtëpinë e J.S. ka ndonjë lidhje me vrasjen. I dyshuari gëzon prezumimin e pafajësisë derisa gjykata të vendosë ndryshe.
Zemërimi publik ka dalë në rrugë. Të premten, protestuesit në Mitrovicë marshuan nga sheshi "Isa Boletini" drejt Gjykatës Themelore, pastaj te Qendra për Punë Sociale, dhe e mbyllën marshimin te Stacioni i Policisë në Jug. Ata mbanin parullat "Drejtësi për Arlindën" dhe "Shteti i ka duart me gjak", ndërsa në muret pranë objektit të policisë shkruan: "A jeni lodhë".
Organizatorja Neri Ferizi tha se protesta ishte shenjë solidariteti me tubimet e tjera, përfshirë ato në Prishtinë. "Këtë protestë e kemi organizuar me aktivistët në Mitrovicë për t’u solidarizuar me protestat e tjera dhe në Prishtinë. Njëkohësisht, edhe pas protestës, siç e keni parë, i kemi njoftuar të vijnë në protestën në Prishtinë që do të mbahet. Ajo që kërkojmë është dorëheqje, llogaridhënie dhe ndjekje penale për të gjithë ata që janë të përfshirë në rast", tha ajo.
Mes protestuesve ishte edhe qytetarja Emine Beqiri: "E rëndë shumë, e dhimbshme shumë, mos me qenë njeriu i sigurt në shtëpinë e vet. Me shku me pa djalin e vet, fëmijën e vet, me qenë e rrezikuar, nuk di, rëndë, vështirë. Gjumi s’po më merr kur po e paramendoj. Drutë me i pre e sheh njeriu sa e rëndë është, s’e lë më njeriun. Shteti ka dështuar, a e ka pa si nëpër filma, policia pasi kryhet krimi vjen. Nuk është veç rasti te Policia jonë, ndodh rasti, tani Policia kinse po vjen."
Në ditën e tretë të protestave për vrasjen e Arlinda Zekajt, turma hodhi tymuese para Ministrisë së Drejtësisë dhe kërkoi largimin e ministres Donika Gërvalla. Ministrja dhe kolegu i saj Xhelal Sveçla pranuan dështimin institucional, por refuzuan të japin dorëheqje.
