Vetëm 31% e amerikanëve mbështesin luftën ndaj Iranit, Trump në minimumin historik

Karburanti më i shtrenjtë, një luftë që nuk po mbaron dhe republikanë që po heqin dorë: kombinimi po e gërryen mbështetjen amerikane për fushatën ushtarake kundër Iranit. Sipas një sondazhi Reuters/Ipsos të publikuar të hënën, vetëm 31 për qind e amerikanëve të anketuar deklaruan se e mbështesin veprimin ushtarak të SHBA-së ndaj Iranit, nga 37 për qind në mars dhe 34 për qind më herët këtë muaj. Është niveli më i ulët që nga fazat e para të konfliktit.

Rënia vjen edhe nga vetë kampi i presidentit. Mes të anketuarve republikanë, mbështetja zbriti në 69 për qind, krahasuar me 77 për qind në mars.

Lufta po rëndon edhe mbi pozitën politike të Donald Trumpit. Për të dytin sondazh radhazi të Reuters/Ipsos, 33 për qind e të anketuarve thanë se e miratojnë punën e tij si president, shifra më e ulët e regjistruar në këtë seri sondazhesh gjatë mandatit të tij të parë dhe të dytë.

Trump e ka mbrojtur fushatën ushtarake si të domosdoshme për të penguar Iranin të zhvillojë armë bërthamore. Konflikti nisi më 28 shkurt me sulme amerikane dhe izraelite ndaj Iranit.

Ndikimi ekonomik mbetet shqetësimi kryesor i amerikanëve. Irani ka mbajtur një bllokadë de fakto të eksporteve të naftës nga rajoni, çka ka kontribuar në rritjen e çmimeve të benzinës në SHBA pranë niveleve rekord. Gjashtë muaj pas nisjes së luftës, karburanti kushton mbi 1 dollar më shumë për gallon (3,8 litra) sesa para konfliktit, një presion i drejtpërdrejtë mbi buxhetet familjare në prag të zgjedhjeve të mesit të mandatit në nëntor.

Ndërkohë, administrata ka premtuar shtrëngim të mëtejshëm të presionit ekonomik mbi Teheranin. Sekretari i Thesarit, Scott Bessent, tha të hënën se SHBA-ja do të godasë të gjitha burimet e të ardhurave të Iranit, përfshirë naftën, me qëllim që vende dhe kompani të tjera të mos bëjnë biznes me Teheranin. Fushata mban emrin "Operation Economic Outcast".

Amerikanët nuk presin një zgjidhje të shpejtë: 83 për qind e të anketuarve besojnë se konflikti do të zgjasë gjatë, nga 80 për qind më herët këtë muaj. Perspektiva e një lufte të gjatë është problem politik për Trumpin, i cili në fushatën presidenciale të vitit 2024 premtoi uljen e inflacionit dhe një strategji "America First" të shmangies së angazhimeve ushtarake jashtë vendit.

Kostot më të larta të karburantit mund t'u krijojnë vështirësi edhe republikanëve që mbrojnë shumica të ngushta në Kongres. Sipas sondazhit, votuesit e pavarur anojnë nga demokratët: 33 për qind prej tyre thanë se do të votonin për një demokrat, kundrejt 19 për qind që do të zgjidhnin një republikan.

Sondazhi i Reuters/Ipsos u realizua me 1.215 të rritur në të gjithë Shtetet e Bashkuara gjatë katër ditësh dhe ka një marzh gabimi prej 3 pikësh përqindjeje në të dyja drejtimet.