Bordi i Paqes: kontributi i Shqipërisë u shtohet atyre të Kosovës dhe Marokut

Kontributi i Kosovës për misionin ndërkombëtar në Gazë ka marrë një partner të ri nga rajoni. Shqipëria ka nënshkruar sot marrëveshjen zyrtare me Bordin e Paqes për t'iu bashkuar Forcës Ndërkombëtare të Stabilizimit (ISF) në Gazë, në një ceremoni të mbajtur në mjediset e Shtabit të Përgjithshëm të Forcave të Armatosura të Shqipërisë.

Bordi i Paqes reagoi menjëherë pas firmosjes. Sipas tij, marrëveshja sjell mbështetje shtesë për operacionet e sigurisë dhe forcon kapacitetet e planifikimit të operacioneve të misionit në Gazë.

"Marrëveshje e rëndësishme ndërmjet Forcës Ndërkombëtare të Stabilizimit dhe Shqipërisë, e cila ofron mbështetje shtesë për operacionet e sigurisë dhe kapacitete për planifikimin e operacioneve për misionin në Gazë. Kontributet e Shqipërisë u shtohen atyre të Marokut dhe Kosovës dhe do të jenë vendimtare për avancimin e qeverisjes, sigurisë, përpjekjeve humanitare, sundimit të ligjit dhe rindërtimit", thuhet në njoftimin e Bordit.

Kështu, Kosova dhe Maroku përmenden si vendet që kanë dhënë tashmë kontributin e tyre, ndërsa Shqipëria hyn si e treta në këtë listë. Nuk është bërë ende e ditur se çfarë përfshin konkretisht kontributi shqiptar, as kur pritet të nisë angazhimi i tij në terren.