Dron godet anije tregtare pranë Rumanisë: një marinar i vdekur, tre të zhdukur

Një marinar ka humbur jetën dhe tre të tjerë ende kërkohen në ujërat e Detit të Zi, pasi një dron goditi një anije tregtare në afërsi të Rumanisë, njoftoi të premten presidenti rumun Nicușor Dan.

"Këtë mëngjes përjetuam një incident sigurie: një anije u godit nga një dron rreth 13 milje detare nga bregu, pak përtej ujërave territoriale të Rumanisë", deklaroi Dan. Sipas tij, roja bregdetare arriti të shpëtojë nëntë marinarë gjatë operacionit të kërkim-shpëtimit. "Fatkeqësisht, një marinar ka vdekur dhe tre të tjerë ende po kërkohen", shtoi ai.

Gjendja e anijes është kritike. Ministria e Brendshme e Rumanisë bëri të ditur se mjeti lundrues pësoi dëme të rënda, është përmbysur dhe tani rrezikon të fundoset. Nuk është bërë ende publik emri i anijes dhe as flamuri nën të cilin lundronte.

Presidenti rumun nuk la vend për dyshime në leximin e tij politik të ngjarjes. "Është e qartë se ky është një incident brenda procesit më të gjerë të përshkallëzimit që Rusia po ndjek në kontekstin e luftës së saj në Ukrainë", tha Dan. Javën e kaluar ai kishte deklaruar se qëllimi i Moskës ishte qartësisht dobësimi i mbështetjes së Rumanisë për Ukrainën, duke u zotuar se Bukureshti nuk do të tërhiqet.

Goditja e së premtes nuk është rast i izoluar. Gjatë muajit të fundit, dronët kanë goditur disa anije mallrash dhe cisterna kimikatesh pranë brigjeve të Rumanisë dhe Bullgarisë, dy vende anëtare të NATO-s, duke shkaktuar gjithsej mbi 20 të vdekur.

Kërcënimi ndaj lundrimit tregtar në Detin e Zi ishte në qendër të një takimi të aleatëve të NATO-s të martën. Pas tij, Dan bëri të ditur se Rumania do të marrë "kapacitete shtesë" për të mbrojtur zonën.