Tulltorja për 50 vjet: VV akuzon Ramën se anashkaloi vlerësimet e ministrive

Hapësira e Tulltores në Prishtinë do të jepet në shfrytëzim për 50 vjet, por vendimi i Komunës ka ndezur një përplasje të ashpër politike. Dega e Lëvizjes Vetëvendosje në kryeqytet akuzon kryetarin Përparim Rama se e publikoi vendimin, bashkë me disa vendime të tjera për caktimin e lokacioneve për projekte të ndryshme, pavarësisht kundërshtimeve nga niveli qendror.

Sipas VV-së, ministritë përkatëse i kishin vlerësuar këto vendime si të kundërligjshme dhe e kishin njoftuar Komunën brenda afatit ligjor. Partia pretendon se Komuna ecën përpara pa i adresuar kundërligjshmëritë e konstatuara dhe se për këtë duhet të japë përgjegjësi personalisht Rama.

Në reagimin e saj, VV i referohet Ligjit për Shqyrtimin Administrativ të Akteve të Komunave, i cili, sipas saj, parasheh procedura për rishqyrtimin e akteve kur konstatohet mospërputhje me ligjin. Partia shkon më tej dhe ngre pikëpyetje për vetë efektivitetin e mbikëqyrjes së ligjshmërisë, nëse Komuna vazhdon të publikojë vendime pavarësisht vlerësimeve të institucioneve përgjegjëse.

Pika e VV-së në Prishtinë e mbylli reagimin me një sulm të drejtpërdrejtë ndaj kryetarit: "Prishtina është kryeqyteti i Republikës. Nuk është republikë e Përparim Ramës!"

Qëndrimi i Komunës dhe i kryetarit Rama ndaj këtyre akuzave nuk dihet ende.