Kurti pret "Koalicionin Shqiptar" pas dy mandateve në Serbi: "Bashkimi nuk duhet të përfundojë"

Dy ulëse në Parlamentin e Serbisë dhe një thirrje nga Prishtina: uniteti duhet të mbijetojë edhe pas votimit. Kryeministri i Kosovës, Albin Kurti, priti sot në zyrën e tij në Prishtinë përfaqësuesit politikë të shqiptarëve të Luginës, të cilët me listën "Koalicioni Shqiptar" fituan dy mandate në zgjedhjet e së dielës në Serbi.

Në takim ishin drejtues partish, aktivistë dhe përfaqësues nga Presheva, Medvegja, Bujanoci dhe Pazari i Ri, të cilët për këto zgjedhje dolën në një listë të vetme. Kurti e paraqiti takimin si vazhdim të asaj që ishte rënë dakord më 29 shtator. Në një postim në Facebook, ai shkroi: "Bashkë, sikurse u dakorduan më 29 shtator, prita sot sërish në Zyrën e Kryeministrit drejtues e përfaqësues të subjekteve politike, aktivistë e bashkëkombës nga Presheva, Medvegja, Bujanoci e Pazari i Ri, të cilët lanë mënjanë dallimet duke u bërë një në listën “Koalicioni Shqiptar”. Përbashkimi solli rezultatin më të mirë të shqiptarëve në Serbi që nga viti 2000. Deri tani, plot 1.233 vota më shumë se në vitin 2020, kur u patën fituar tri mandate".

Shifrat që citoi kryeministri tregojnë një rritje të votave, ndonëse lista përfundon me dy mandate, një më pak se tri ulëset e fituara në vitin 2020.

Kurti e vendosi rezultatin edhe në kontekstin e pakicave kombëtare në Serbi: "Shqiptarët janë pakica e katërt për nga popullsia në Serbi, por në zgjedhjet e së dielës atje janë renditur të dytët për nga votat dhe të parët për nga mandatet, së bashku me hungarezët, ndër listat e pakicave kombëtare. Dy partitë më të mëdha në Serbi kanë së bashku 244 mandate. Katër listat e pakicave, gjashtë. Dy prej tyre janë të “Koalicionit Shqiptar”".

Sipas tij, vlera e këtij rezultati nuk matet vetëm me numra. Kurti tha se "rëndësia e rezultatit shqiptar i kalon numrat, sepse është arritur në rrethana të pasivizimit të adresave, mosnjohjes së diplomave, përjashtimit sistematik nga institucionet publike, diskriminimit ekonomik, emigrimit dhe zbrazjes së vendbanimeve shqiptare".

Kryeministri e mbylli mesazhin me një thirrje drejtuar të zgjedhurve dhe komunitetit shqiptar në Serbi: "Për më shumë se dy dekada, shqiptarët kanë qenë njëfarë opozite e dyfishtë. Opozitë ndaj pushtetit dhe opozitë ndaj shtetit, i cili e kishte vendosur veten në opozitë ndaj tyre. Bashkimi nuk duhet të përfundojë. Duhet ta kuptojmë që më 25 tetor, bashkimi, që është cilësi e re, e ka një kapitull të ri, që duhet të vazhdojë me mbrojtje të fuqishme të të drejtave, me kërkesën për barazi dhe në përpjekjen për jetë dinjitoze në vendlindje. Dy mandatet janë arritje e përbashkët, e mbi të gjitha, janë edhe përgjegjësi e përbashkët. Aty ku janë mundësitë më të mëdha, edhe përgjegjësia është më e madhe".