Tri varreza masive të dyshuara në Zubin Potok: mbetje kockore të së paku 23 personave

Mbetje kockore që dyshohet se u përkasin së paku 23 individëve janë gjetur në tri lokacione të dyshuara të varrezave masive në komunën e Zubin Potokut. Të dhënat u bënë publike më 20 gusht 2026, në një konferencë të jashtëzakonshme të Policisë së Kosovës, të mbajtur në Qendrën e Njësive Speciale "Enver Zymeri".

Zbulimet lidhen me rastin e njohur si "Krimet e Luftës ndaj Popullatës Civile" në Kosovë. Sipas Policisë së Kosovës, tre persona, të identifikuar me inicialet J. R., M. J. dhe M. B., janë nën hetim nën dyshimin për kryerjen e veprës penale "Krime lufte kundër popullsisë civile". Të tre ndodhen aktualisht në masën e paraburgimit dhe, deri në një vendim të gjykatës, konsiderohen të pafajshëm.

Në të njëjtën konferencë, policia paraqiti detaje mbi operacionet e realizuara në 48 lokacione të ndryshme të komunës së Zubin Potokut. Aty u ekspozua edhe arsenali i armëve, municioni, pajisje të ndryshme ushtarake dhe dëshmi të tjera relevante, të konfiskuara gjatë këtyre veprimeve.

Policia e Kosovës ka njoftuar se të gjitha veprimet e mëtejme po ndërmerren në bashkëpunim dhe në koordinim me institucionet kompetente dhe organet e drejtësisë.