Supremja rrëzon rregullin e MPB-së: policia s'mund ta mbajë patentën mbi 8 ditë

Tetë ditë. Aq mund ta mbajë Policia e Kosovës patentë-shoferin e një drejtuesi mjeti, jo tre, gjashtë apo dymbëdhjetë muaj. Gjykata Supreme e Kosovës ka shpallur të paligjshëm dhe ka shfuqizuar paragrafin 3 të nenit 17 të Udhëzimit Administrativ Nr. 05/2023 për Procedurat e Kundërvajtjes, akt nënligjor i Ministrisë së Punëve të Brendshme.

Dispozita e rrëzuar përcaktonte se pala mund ta tërhiqte patentë-shoferin vetëm pasi të kishte përfunduar masa mbrojtëse e ndalimit të drejtimit të mjetit. Me këtë rregull, kthimi i dokumentit mbetej i lidhur me kohëzgjatjen e masës, e cila mund të shkojë deri në një vit.

Vendimin e mori Kolegji i Gjykatës Supreme, në një konflikt administrativ të hapur me padinë e 28 paditësve kundër Ministrisë së Punëve të Brendshme dhe Policisë së Kosovës. Kolegji e aprovoi pjesërisht si të themeltë kërkesëpadinë për shfuqizimin e pjesshëm të aktit nënligjor normativ.

Në thelb të arsyetimit qëndron një dallim që, sipas Gjykatës, nuk duhet ngatërruar në zbatim: marrja e përkohshme e patentë-shoferit nga policia është një gjë, ndërsa masa mbrojtëse e ndalimit të drejtimit të mjetit është tjetër. Bëhet fjalë për dy institute të ndryshme juridike.

Gjykata u mbështet te neni 244 i Ligjit Nr. 08/L-186 për Rregullat e Trafikut Rrugor, sipas të cilit mbajtja e përkohshme e dokumentit nga policia nuk mund të zgjasë më shumë se tetë ditë. Prandaj, kushtëzimi i tërheqjes së patentë-shoferit me mbarimin e masës mbrojtëse u gjet në kundërshtim me ligjin.

Supremja nënvizoi edhe një parim më të gjerë: një akt nënligjor nuk mund t'i zgjerojë kompetencat që i jep ligji dhe as të vendosë kufizime shtesë pa bazë ligjore.

Jo gjithçka që kërkuan paditësit u pranua. Gjykata e refuzoi si të pabazuar kërkesën për shfuqizimin e paragrafëve 1 dhe 2 të të njëjtit nen. Sipas saj, këto dispozita kanë karakter procedural dhe organizativ: përcaktojnë njësinë policore përgjegjëse për administrimin e dokumentit dhe detyrimin për të lëshuar vërtetim kur patentë-shoferi merret përkohësisht, pa i tejkaluar autorizimet që jep ligji.