Rasti Zekaj: Avokati i Popullit hap hetim, në Pejë këpucët e policëve lyhen me të kuqe

Vrasja e Arlinda Zekajt ka hyrë tani edhe në tryezën e Avokatit të Popullit. Naim Qelaj, Avokat i Popullit, deklaroi sot para Komisionit për të Drejtat e Njeriut, Barazi Gjinore dhe Peticione se institucioni që drejton e ka hapur rastin për hetim dhe se ka shenja që shteti mund të ketë dështuar në parandalimin e tragjedisë.

Qelaj e lidhi rastin me ndërhyrjen e familjarëve që, sipas tij, nuk kanë të drejta pronësore, një situatë që përfundoi në tragjedi, "natyrisht me dështimin e shtetit, nëse konstatohet që ka pasur dështime, e po shihet se mund të ketë pasur dështime". Përgjegjësia e institucioneve nuk është konstatuar ende zyrtarisht.

Pikëpyetja kryesore mbetet zinxhiri i institucioneve që dinin. Sipas Qelajt, e ndjera ishte drejtuar në polici, në prokurori, në Qendrën për Punë Sociale, te mbrojtësi i viktimave dhe në mekanizma të tjerë që duhej të reagonin. Në këtë listë ai përfshiu edhe nivelin lokal: "pra edhe Komuna e Pejës është e përfshirë".

Avokati i Popullit kërkoi që dhuna ndaj grave të dalë nga kuadri i rasteve të veçuara. "Kosova ka nevojë për një diskutim në nivel nacional për të vendosur barazinë gjinore, dhunën ndaj grave dhe dhunën në familje si interes nacional dhe jo të diskutohet vetëm në nivel të rasteve të izoluara. Për këtë besoj jemi vonë, por më mirë të fillojmë tash. Rastin e fundit e kemi hapur për hetim", tha ai.

Para deputetëve, Qelaj ngriti edhe një alarm të ri. Ai tha se institucioni i tij ka pranuar dje dhe javën e kaluar një rast shumë të ndjeshëm nga një komunë e Kosovës, të cilën nuk e emërtoi: një grua që kishte kërkuar mbështetje nga komuna dhe u refuzua, me arsyetimin se nuk ka bazë ligjore. Sipas Qelajt, rasti mund të përfundojë me pasoja fatale. "Ne e kemi pasur një paralajmërim prej saj se mund të ketë pasoja çfarë mund të jenë", tha ai, duke u ofruar anëtarëve të komisionit t'u shpërndajë më vonë informacione.

Ndërkohë, zemërimi vazhdon në rrugë. Gjatë protestës në Pejë, këpucët e zyrtarëve policorë u lyen me ngjyrë të kuqe, në shenjë revolte për vrasjen. Pamjet nga vendi tregojnë policët me këpucët e ngjyrosura, ndërsa protestuesit kërkojnë drejtësi për Zekajn dhe llogari nga institucionet. Protesta të tilla po mbahen prej disa ditësh në qytete të ndryshme të Kosovës.

Arlinda Zekaj, 49 vjeç, u vra të dielën, më 25 tetor, në Vitomiricë të Pejës. I dyshuar për vrasjen është kunati i saj, A.S. Rasti ka shkaktuar reagime të forta nga qytetarët dhe institucionet, si dhe kritika të ashpra për mënyrën se si u trajtua viktima para se të vritej.

Pasojat institucionale tashmë kanë nisur. Drejtori i përgjithshëm i Policisë së Kosovës, Gazmend Hoxha, dha sot dorëheqjen në lidhje me rastin. Një ditë më parë u suspenduan kryeprokurorja në Pejë, Lumturie Vuçetaj, prokurorja Arlinda Nallbani-Gacaferri dhe 11 zyrtarë policorë.