Putini pret emisarët e Trumpit në Moskë: "situatë e vështirë" dhe tri ditë pa sulme

Pak para orës 19:00 nisi në Moskë takimi i pritur mes presidentit rus, Vladimir Putin, dhe dy emisarëve amerikanë, Steve Witkoff dhe Jared Kushner, dhëndrit të presidentit amerikan Donald Trump. Në një video të publikuar në kanalin e Kremlinit në aplikacionin e mesazheve MAX, Putini e cilësoi situatën "të vështirë".

Witkoff dhe Kushner kishin zbritur në Moskë të shtunën paradite për të diskutuar një propozim për t'i dhënë fund luftës. Në aeroport ata u pritën nga emisari special i Rusisë, Kirill Dmitriev. Sipas planit, të dy emisarët amerikanë do të vijojnë udhëtimin drejt Kievit të dielën.

Pak orë para takimit, agjencia ruse e lajmeve Interfax njoftoi se Putini kishte dhënë urdhër për ndalimin e sulmeve ndaj Ukrainës për tri ditë, duke nisur nga mesnata.

Presidenti ukrainas, Volodimir Zelenski, shkroi rreth orës 18:00 në platformën Telegram: "Sapo kam folur me emisarët e presidentit amerikan". Në të njëjtin mesazh ai deklaroi: "Që tani e tutje jemi të gatshëm të respektojmë një armëpushim për sa u përket sulmeve ajrore ndaj qyteteve që janë të përfshira në procesin e negociatave".

Urdhri për ndalimin e sulmeve ajrore erdhi pak kohë pasi Zelenski kishte njoftuar për sulme ruse ndaj aeroporteve të Kievit dhe Boryspilit. Hapësira ajrore mbi Ukrainë është e mbyllur që nga viti 2022, por, sipas Zelenskit, ishte diskutuar mundësia që emisarët amerikanë të fluturonin drejt Ukrainës. Sulmet ai i quajti reagim të drejtpërdrejtë ndaj këtyre planeve: "Dronët rusë-iranianë Shahed janë përgjigjja ndaj diplomacisë amerikane", shkroi presidenti ukrainas në Telegram.