Pronari i "Sante Plus" në pranga në Maqedoninë e Veriut, Shqipëria e kërkonte prej një viti

Pas më shumë se një viti në kërkim nga autoritetet shqiptare, pronari i rrjetit spitalor "Sante Plus", Bilal Kara, ka përfunduar në pranga në Maqedoninë e Veriut. Në të njëjtën kohë u arrestua edhe Geriana Arapi, ish-drejtuese e spitalit, e cila ishte gjithashtu e shpallur në kërkim.

Arrestimi i të dyve u bë i ditur më 29 tetor nga mediat maqedonase. Ai ndodhi gjatë një operacioni të gjerë të autoriteteve të Maqedonisë së Veriut, i cili synon dyshimet për abuzime me ndërhyrjet kirurgjikale në sy dhe për përfshirjen e zyrtarëve të Fondit të Sigurimit Shëndetësor. Sipas raportimeve, Kara është dërguar para gjykatësit të procedurës paraprake.

Operacioni çoi në ndalimin e tetë personave. Sipas autoriteteve maqedonase, 11 individë dhe një institucion privat shëndetësor dyshohen për shkelje që lidhen me faturimin e ndërhyrjeve kirurgjikale. Në rastet që po hetohen, pagesat për këto ndërhyrje kryheshin si nga Fondi i Sigurimit Shëndetësor, ashtu edhe nga vetë pacientët. Gjatë kontrolleve u sekuestruan rreth 50 mijë euro dhe telefona celularë.

Emrat e të dyve kishin dalë më parë në Shqipëri. Arapi ishte shpallur në kërkim pas bllokimit të klinikës "International Medicare" në Tiranë, në shtator të vitit 2025, ndërsa Kara kërkohej nga autoritetet shqiptare prej më shumë se një viti. Të dy mbeten të dyshuar derisa të ketë një vendim gjykate.