I dënuar në Itali për drogë, zhvatje e molotov, 38-vjeçari kapet në Vlorë për ekstradim

Një 38-vjeçar nga Selenica, të cilin drejtësia italiane e ka dënuar me 7 vjet, 3 muaj e 15 ditë burgim, është kapur në qytetin e Vlorës dhe është arrestuar me qëllim ekstradimin në Itali, njofton Policia e Shtetit.

Kapja erdhi me operacionin e koduar "Target 1", të organizuar nga Seksioni për Hetimin e Narkotikëve i DVP Vlorë, si pjesë e punës për lokalizimin e personave të shpallur në kërkim. Sipas policisë, hetuesit u mbështetën edhe në informacione të siguruara në rrugë operative për vendndodhjen e tij. I arrestuari identifikohet me inicialet S. M., i njohur edhe si S. P., banues në Selenicë.

Dënimi është dhënë nga Gjykata e Apelit e Bolonjës dhe mbulon një listë të gjatë veprash të kryera nga 1 shkurti 2015 deri më 12 shkurt 2020. Ato përfshijnë prodhimin dhe shitjen e lëndëve narkotike, zhvatjen dhe tentativën për zhvatje në bashkëpunim, posedimin dhe përdorimin e mjeteve zjarrvënëse (Molotov) në zonën e Riminit, falsifikimin e dokumenteve të identifikimit, rikthimin e paligjshëm në Itali dhe mbajtjen e armëve pa autorizim.

Nga ky dënim, 38-vjeçarit i mbeten ende për të vuajtur 6 vjet, 4 muaj e 3 ditë. Ekstradimi nuk është kryer ende: Interpol Tirana, në bashkëpunim me homologët italianë, po vijon procedurat për dorëzimin e tij në Itali.