Plantacion kanabisi në pyjet e Huescës: katër shqiptarë në pranga, 220 kg marijuanë

Në mes të një pylli në zonën Hoya de Huesca, në Spanjë, funksiononte një plantacion kanabisi i pajisur si një punishte e vërtetë. Garda Civile e zbuloi atë dhe arrestoi katër shqiptarë, të moshës 36-50 vjeç, të cilët banonin në Barcelonë. Ata akuzohen për kultivim kanabisi. Sipas mediave spanjolle, operacioni u zhvillua më 17 tetor.

Agjentët gjetën në terren 72 bimë kanabis sativa që kishin lulëzuar. Por kjo ishte vetëm pjesa që kishte mbetur: gjurmët në plantacion tregonin se aty ishin korrur më parë rreth 1.000 bimë.

Pranë plantacionit ishte ngritur një ambient i madh për tharjen e marijuanës. Në vend u gjetën edhe dy tenda kampingu: në njërën qëndronin të arrestuarit, ndërsa tjetra shërbente si depo, me rezervuarë për ujitje, plehra dhe fertilizues të tretshëm në ujë, të përdorur për të nxitur rritjen e bimëve.

Lista e pajisjeve të gjetura flet për një prodhim të organizuar: makineri për përpunim dhe për heqjen e kërcellit e të degëzave, ventilatorë, një ngrohës industrial me ajër të nxehtë dhe një gjenerator që furnizonte gjithë ngritjen me energji.

Përveç bimëve, autoritetet spanjolle sekuestruan 220 kilogramë sytha marijuane, vlera e të cilave në treg vlerësohet në afërsisht 413.000 euro. Të katërt mbeten të akuzuar dhe çështja e tyre do të shqyrtohet nga drejtësia spanjolle.