Norvegjia premton 9,2 miliardë dollarë të tjerë për Ukrainën, ndërsa liderët nordikë zbresin në Kiev

Ndërsa Rusia dhe Ukraina po e zhvendosin luftën gjithnjë e më thellë drejt infrastrukturës ekonomike të njëra-tjetrës, Oslo ka vënë në tryezë një shifër të re: 85 miliardë korona norvegjeze, ose rreth 9,2 miliardë dollarë, mbështetje financiare shtesë për Ukrainën në vitin fiskal 2027. Shuma u njoftua të dielën nga qeveria e vendit nordik dhe përputhet me nivelin e ndihmës së dhënë për vitin 2026.

Paratë do të mbulojnë njëkohësisht shpenzime ushtarake dhe humanitare, sipas kryeministrit norvegjez Jonas Gahr Stoere, deklaratë e përcjellë nga qeveria e Norvegjisë. "Mbështetja dhe rindërtimi i Ukrainës nuk është vetëm ndihmë. Është investim në sigurinë e vetë Evropës", tha Stoere.

Njoftimi vjen në ditën kur Stoere dhe liderë nga i gjithë rajoni nordik dhe baltik ndodhen në Kiev, në një vizitë të konceptuar si shenjë mbështetjeje për Ukrainën në luftën me Rusinë.

Në krahun tjetër të frontit, presidenti rus Vladimir Putin deklaroi të shtunën se Kievi ka hapur "kutinë e Pandorës" me sulmet ndaj objektivave ekonomikë rusë dhe se Moska do të kundërpërgjigjet duke goditur "sektorët më të ndjeshëm ekonomikë" të Ukrainës.

Paralajmërimi pasqyron fazën aktuale të konfliktit: të dyja palët po intensifikojnë sulmet me dronë kundër infrastrukturës ekonomike, shpesh duke goditur objektiva shumë larg vijave të para të frontit. Lufta nisi me pushtimin rus të Ukrainës më 24 shkurt 2022.