Nata e trazirave në Gjermani: dyqane të plaçkitura në Frankfurt pas protestave rinore

Vitrina të thyera, dyqane të plaçkitura dhe kokteje molotov të hedhura ndaj ekipeve të emergjencës: kështu u mbyll të shtunën vonë në Frankfurt, qendra financiare e Gjermanisë, një ditë protestash masive që deri në mbrëmje kishin qenë kryesisht paqësore. Policia e qytetit njoftoi në rrjetin social X se në qendër po zhvilloheshin "trazira të dhunshme".

Dhuna nuk mbeti vetëm në Frankfurt. Përplasje me policinë u raportuan edhe në Berlin, Këln dhe Hamburg. Sipas policisë, protestuesit sulmuan punonjësit e emergjencës me fishekzjarre, gurë dhe shishe, ndërsa forcat e rendit përdorën topa uji për t'i shpërndarë.

Në Frankfurt, policia mbylli një pjesë të madhe të rrugës kryesore tregtare të qytetit. Një zëdhënës i policisë tha se u bënë shumë arrestime, pa dhënë një shifër të saktë. Në përditësimet e mëvonshme, zyrtarët bënë të ditur se ishin thyer xhamat e një dyqani armësh dhe se, pas arrestimit të një të dyshuari, u sekuestruan dy armë.

Protestat ishin organizuar nga grupi i fushatës Gen Z regelt, emër që do të thotë "Gjenerata Z merr kontrollin". Mijëra të rinj dolën në rrugë kundër financimit të pamjaftueshëm të shkollave, kostos së lartë të jetesës, shkurtimeve të shpenzimeve publike dhe shërbimit ushtarak. Autoritetet në Frankfurt, Mynih dhe Berlin raportuan deri në 18.000 protestues, afërsisht gjysma e numrit që organizatorët kishin parashikuar në faqen e tyre të internetit.

Zëdhënësja e grupit, Lina Friedrich, tha se demonstratat ishin "për të luftuar për paqe dhe liri, në vend të luftës dhe shtrëngimit". Ajo shtoi: "Ajo që ka më shumë rëndësi për ne është mbështetje më e mirë për sistemet e shëndetësisë dhe arsimit. Ne jemi kundër shërbimit të detyrueshëm ushtarak dhe jemi në favor të një ndarjeje më të drejtë të barrës."

Një lexim krejt tjetër të asaj që ndodhi pas rënies së errësirës dha Roman Poseck, ministri i Brendshëm i landit të Hesenit. Sipas tij, protesta në Frankfurt ishte infiltruar nga "rreth 100 ekstremistë të majtë qartësisht të identifikuar", dhe mënyra si përfunduan demonstratat ishte "e turpshme".

Poseck e lidhi drejtpërdrejt situatën me atë që po ndodh në vendin fqinj: "Të gjithë i kemi në mendje ato pamje nga Franca: plaçkitje, shtëpi që digjen, automjete policie që digjen dhe sulme ndaj policëve... Franca nuk duhet të merret si model në këtë drejtim."

Trazirat në Gjermani erdhën në të njëjtën ditë me protesta të ngjashme masive të udhëhequra nga të rinjtë në Francë, ku më shumë se 320.000 njerëz demonstruan të shtunën kundër rritjes së kostos së jetesës dhe shërbimeve të dobëta publike. Edhe atje pati përplasje mes një pjese të protestuesve dhe policisë.