Mamdani: Trump i jep vizë nënës së 15-vjeçarit ganez të vrarë në Bronks

Nëna e një adoleshenti 15-vjeçar nga Gana, i vrarë me armë zjarri në Bronks, mund të marrë së shpejti vizën për të ardhur në Shtetet e Bashkuara. Këtë e njoftoi të shtunën kryebashkiaku i Nju Jorkut, Zohran Mamdani, pas një bisede telefonike me presidentin Donald Trump.

"Vrasja e një fëmije është një dhimbje që asnjë prind nuk duhet ta durojë, e lëre më nga mijëra milje larg", shkroi Mamdani në rrjetin social X. Ai shtoi se nëna e djalit meriton t'i japë lamtumirën të birit personalisht, ndërsa për bisedën me presidentin tha: "Sapo mbylla telefonin me presidentin Trump dhe ai ka pranuar t'ia japë vizën asaj menjëherë." Shtëpia e Bardhë nuk iu përgjigj menjëherë një kërkese për të konfirmuar se administrata do ta lëshojë vizën.

Krimi ndodhi të enjten, pak para orës 9:30 të mëngjesit. Sipas policisë së Nju Jorkut, 15-vjeçari po shkonte në shkollë në një lagje të Bronksit kur u godit me plumb në bark. Ai u shpall i vdekur në spital po atë ditë. Deri tani nuk është arrestuar askush, hetimet vazhdojnë dhe policia ende po kërkon autorët e vrasjes.

Babai i djalit tregoi se i biri u qëllua vetëm një bllok larg shtëpisë, ndërsa ecte drejt shkollës në mëngjes. Ai e përshkroi atë si një adoleshent të qetë, që e kalonte pjesën më të madhe të kohës me celularin në dorë.

Disa ditë para të shtënave, babai kishte mësuar se djali po ngacmohej në shkollë. "Ishte drejtori që ma tha", u tha ai gazetarëve. "Ai tha se dy djem po e shqetësonin djalin tim, ndaj i ka pezulluar të dy. Djali im është në shkollë. Ai është i pafajshëm, kështu që e telefonoj. Flas me djalin tim, ai më tha 'babi, jam mirë.'" Autoritetet nuk kanë bërë ndonjë lidhje mes këtij episodi dhe vrasjes.

Sipas kongresmenit demokrat të Bronksit, Ritchie Torres, adoleshenti kishte mbërritur nga Gana një vit më parë për t'u bashkuar me të atin dhe për të nisur një jetë të re në SHBA. "E gjithë lagjja jonë është në zi për një djalë të ri që duhej ta kishte gjithë të ardhmen përpara", deklaroi Torres. "Çdo fëmijë në Bronks meriton të ecë drejt shkollës pa pasur frikë për jetën e tij", shtoi ai.

Edhe Mamdani e përshkroi vrasjen si një plagë për gjithë metropolin: "I gjithë qyteti i Nju Jorkut është në zi për këtë tragjedi."

Rasti ka tërhequr vëmendjen edhe në Ganë. Ministri i Jashtëm ganez, Sam Okudzeto Ablakwa, njoftoi në X se zyrtarët ganezë në Nju Jork po bashkërendojnë punën me autoritetet vendore dhe se ministria e tij "do të punojë pa u lodhur me autoritetet amerikane për të siguruar që drejtësia të vendoset".

Premtimi për vizën vjen në një kohë kur Trump, gjatë mandatit të tij të dytë, ka shtrënguar ndjeshëm politikat e imigracionit, përfshirë pezullimin e shqyrtimit të vizave për shtetasit e 75 vendeve.